Президент хавфсизлик хизмати бошлиғи ўринбосари ва давлат раҳбарининг кичик куёви Отабек Умаров «Инстаграм» саҳифасида автомобил ойналарини қорайтириш-«тонировка» масаласига эътибор қаратди. 

«Менга «Инстаграм»даги саҳифам орқали баҳсли мавзу — «тонировка» борасида жуда кўп мурожаат келиб тушмоқда. Шу сабабли ва бу актуал мавзунинг қисман хавфсизлик масаласи билан боғлиқлиги учун ўз фикримни билдиришга қарор қилдим. Фикримча, «тонировка» мавзуси Ўзбекистон шароитида долзарб ва ўринли кўтарилган. Чунки юртимизда иқлим шароити ёз ойлари, айниқса, чилла пайти жуда оғир бўлади.

Масаланинг муҳим эканлигини ҳамда Интернет тармоқлари орқали жамоатчилик, блогерлар ва депутатлар мурожаатларини инобатга олиб, биз мутасадди давлат идораларига бу масалани амалиётга жорий қилиш юзасидан тегишли тавсиялар бердик. Ҳозирда «тонировка» мавзуси бошқа давлатлар тажрибасидан келиб чиқиб, ҳар томонлама кўриб чиқилмоқда» деб ёзади Умаров.

Унинг фикрича, «автоулов «тонировка»си хавфсизлик масалаларини ҳал қилишда ва таъминлашда бизга тўсиқ бўлолмайди».