Хитойлик аёл ўлим тўшагида ётган эрини вафот этган деб ўйлаб, ўликхонага жўнатди. Бу ҳақда «South China Morning Post» нашрига асосланиб, «РИА Новости» хабар қилмоқда.

Мазкур ҳодиса Хитойнинг марказидаги Хубэй вилоятининг Шиян шаҳрида содир бўлган. Хуан фамилияли эркакда ошқозон саратонининг сўнгги босқичи аниқланган. Хотини эрталаб уни уйғотишга ҳаракат қилганда Хуан уйғонмаган. Аёл эрини тунда вафот этган дея дафн хизматини чақирган, улар эса «ўлик»ни ўликхонага олиб кетишган.

Бир неча соат ўтгач, жасадни кўмиш учун қайта кийинтириб, гримм қилувчи ходимлар Хуаннинг бармоқлари ва лаблари қимирлаганини пайқашган. Беморнинг томир уриши текширилгач, унинг тириклиги маълум бўлган. Хизматчилар зудлик билан тез ёрдам чақирганлар, аммо врачлар келгунига қадар бемор жон берган.

«Бундай ҳолат менинг тажрибамда учинчи маротаба содир бўлмоқда», — деган дафн этиш бюроси бошлиғи.

У вафот этди деб тахмин қилинган оғир беморларнинг яқинларига уларнинг томир уришини диққат билан текшириб кўришни маслаҳат берган.