28 март куни «Ўзбекистон темир йўллари» АЖ томонидан уюштирилган брифингда Тошкент метроси қурилишидаги 3 та лойиҳа хусусида маълумот берилди. 

Унга кўра, узунлиги 6,8 километр, умумий қиймати – 170,1 млн АҚШ долларини бўлган Сергели линияси 2019 йил оҳирига қадар қуриб фойдаланишга топширилади.

Сергели метро линияси бугунги кунгача Марказий Осиёда қўлланилмаган бутунлай янгича эстакада усулида бунёд этилмоқда. Яъни мазкур йўл кўприксимон тарзда қурилади, поездлар ер устида ҳаракатланади. «Боштранслойиҳа» акциядорлик жамияти томонидан асосий лойиҳа ишлаб чиқилган бўлиб, унга кўра ушбу йўналишдан 6 та бекат ўрин олган.

Поездлар тўхташ маскани, яъни бекатлар 5 та вагондан иборат метро поездига мўлжалланиб қурилмоқда. Йўловчиларнинг станцияга киришлари учун бир томондан 3 та эскалатор ва иккинчи томондан имконияти чекланган фуқаролар учун лифт ўрнатилиши кўзда тутилган. Шу томонда яна авария холатларида фойдаланиш учун зиналар ўрнатилади.

«Тошкент метрополитени Юнусобод йўналишининг иккинчи босқичи қурилиши» лойиҳасининг эса умумий қиймати – 124,8 млн. АҚШ долларини ташкил этади, узунлиги 2,93 километрдан иборат. Қурилиш ишлари жорий йилда тўла ниҳоясига етказилиши кўзда тутилган. Ушбу йўналишда бекатлар сони 2 та (Юнусобод ва Туркистон) бўлиб, уларнинг ўртача оралиғи 1,43 км. Платформаларнинг узунлиги 102 метрни ташкил этиб, электропоездлар икки томонлама ҳаракатланади.

3-лойиҳа бу ер усти метро халқа йўли қурилиши бўлиб, унинг умумий узунлиги 54,8 километрни ташкил этади. 2017-2021 йилларга мўлжалланган лойиҳа олти босқичда амалга оширилади. Ушбу метро линиясида 35 та бекат қурилади.

Дастлабки босқичда Тошкент метрополитенининг «Дўстлик» бекатидан Қўйлиқ бозоригача бўлган (11 км) 8 та бекатдан иборат қисми қурилади. Кейинчалик, у «Олмазор», «Беруний», «Бодомзор», «Тузель» бекатлари орқали яна «Дўстлик» бекатига туташтирилиб, яхлит метро халқасини ташкил этади. Бундан ташқари 2 та вагон депоси қуриш ҳам режалаштирилган. Мазкур метро йўли Яшнаобод, Учтепа, Олмазор, Юнусобод, Чилонзор ва Сергели туманлари худудидан ўтади.