Сирдарё вилояти божхона бошқармасининг Контрабанда ва божхона қоидалари бузилишига қарши курашиш бўлими ходимлари бошқа ҳуқуқни муҳофаза қилувчи идоралар билан ҳамкорликда қўшни давлатдан Ўзбекистонга «Ховособод» чегара божхона пости орқали товар-моддий бойликлар майда партияларда олиб ўтилишига қарши курашиш бўйича тадбир ўтказишди.

Фуқаро Х.З. нинг яшаш хонадонидан чиқиб, Ховос-Тошкент йўналиши бўйлаб ҳаракатланиб кетаётган фуқаро Н.А. бошқарувидаги «Оpel» русумли енгил автотранспорт воситаси кузатувга олиниб, Янгиер шаҳар ИИБ ЙҲХБ блок-постида тўхтатилиб, холислар иштирокида автомашина салони ва юкхонаси кўздан кечирилди.

Натижада, ушбу автомашинада хорижда ишлаб чиқарилган, ҳеч қандай ҳужжатлари бўлмаган умумий қиймати 18 000 000 сўмлик, жами 12 дона «Canon 1/3» русумли принтерлар борлиги аниқланди.

Юк эгаси эса ашёвий далил сифатида олинган мазкур 12 дона принтерни постдан биринчи маротаба ҳаракатланаётган фуқароларни маълум ҳақ эвазига ёллаб, «Ховособод» чегара божхона пости орқали бўлиб-бўлиб олиб ўтилишини ташкиллаштирганини маълум қилди.

Давлат божхона қўмитаси хабар беришича, ҳозирда ушбу ҳолат юзасидан текширув ҳаракатлари олиб борилмоқда.