Оналар учун боласини ўз вақтида ухлатишдан машаққатлироқ иш бўлмаса керак. Соат миллари тун қаърига ёриб боряпти — бола эса ухлашни хаёлига ҳам келтирмайди. Нима қилиш керак? Бунинг чораси бор, яна бир нечта, «Liverpoolecho» маслаҳатларига қулоқ тутамиз.

Сузиш

Шуни ёдда тутинг, кун бўйи жисмоний фаол бўлган бола кечга бориб тез ухлаб қолади. Масалан, сузиш. Бола ҳам кунни қувноқ ўтказади, ҳам чиниқиб, толиқади (яхши маънода, албатта).

Тоза ҳавода сайр

Бола учун (катталар учун ҳам) тоза ҳаводан яхшироқ нима бўлиши мумкин? Албатта, кечки сайрда болангиз билан бир оз андармон бўлишингизга тўғри келади, баҳонада ўзингиз ҳам ортиқча калориядан қутуласиз.

Аравача керак эмас

Албатта, болани қўлда кўтариб юриш билан аравачада олиб юришнинг фарқи катта. Бироқ бола оёғининг чигилини ёзиб турганияхши — шундоқ ҳам кун бўйи «уй қамоғи»да бўлса. Энг муҳими, юрган бола тез уйқуга кетади.

Ўйинлар тинчлантиради

Болангизга бошқа болалар билан ўйнаши учун шароит қилиб беринг. Бола катта бўлгани сайин бошқа болалар даврасига интилавериши табиий жараён: кўради, ўрганади, мулоқот қилади.

Уйдаги дискотека

Кечга бориб ҳам тетиклигини йўқотмаган болани «чарчатиш»нинг ягона йўли — рақс. Ишонинг, сакраш, ирғишлайвериш охир-оқибат боланинг тез ухлаб қолишига олиб келади.

Иссиқ ванна

Иссиқ сувга кирганида одам енгиллик ҳис қилади. Болаларни-ку айтмаса ҳам бўлади. Кечки иссиқ ванна боланинг тинч ва хотиржам ухлашини 100 фоиз кафолатлайди.

Эртак айтинг

Айтиб ўтилган усулларнинг энг ишончли ва синовдан ўтгани. Болангизни жойига ётқизиб эртак айтинг ёки китоб ўқиб беринг.