Бир аср-у йигирма йил муқаддам асаб тизими зўриқишларини даволаш учун ихтиро қилинган (ажабо!) бу ичимлик дуппа-дуруст тозаловчи восита ҳам экан. «T-online» ёзишича, ичимлик таркибига кислоталиликни меъёрлаштирувчи ортофосфор кислотаси киргани боис, бекалар «Кока-кола»дан уй ва буюмларни тозалашдек машаққатли юмушда бемалол фойдаланишлари мумкин.

Сантехника

Буюмлар сиртидаги кетиши қийин кирларни кетказишда «Кока-кола» бошқа тозаловчи воситалардан қолишмайди. Бунинг учун у хамирни оширишда қўлланувчи восита («разрыхлитель») билан аралаштирилади ва юзага сурилади. Ярим соатдан бир кечагача шундай қолдирилади. Кейин чўтка билан тозаланса худди янгидек ялтираб кетади.

Това

Тагига олган товани «Кока-кола» ёрдамида тозалаш жуда осон. Бунинг учун товага икки сантиметрча баландликда «Кока-кола» қуйилади ва ярим соат суст оловда қайнатилади. Кейин това оқар сувда ювиб ташланади.

Чойнак

Одатда бу ошхона жиҳозини лимон кислотаси ёки сиркада тозалаш тавсия қилинади. Бироқ чойнакнинг ички деворларига ёпишган оҳаксимон қотишмани «Кока-кола» ёрдамида ҳам йўқотса бўлади. Бунинг учун чойнак «Кока-кола» билан тўлдирилиб, бир оқшомга қолдирилади. Эрталаб қарабсизки, чойнак топ-тоза!

Занг

Темир буюмларда пайдо бўлган зангни йўқотишда ҳам «Кока-кола» сизга ёрдамга келади. Бунинг занглаган юзага ичимликдан қуйилади ва шимиб олганидан сўнг кичикроқ чўтка, масалан, эски тиш чўткаси билан тозалаб ташланади. Занглаб кетган ва ечилиши қийин мурватларни ҳам «кола» билан очиш осонлашади.

Mox

«Кока-кола» мохни йўқотишда ҳам ажойиб воситалигини намоён этди. Яна бир ажойиб томони, у мохнинг қайта пайдо бўлишига йўл қўймайди ва тош юзанинг жилосини йўқотмайди. «Кока-кола» билан деворларга ишлов берилганда тошли қопламалар учун ишлатилган қоришмаларга зиён етмайди.