Россия ташқи ишлар вазири Сергей Лавров Европа Иттифоқи ва НАТО Россия билан урушиш учун коалиция йиғмоқда, деб ҳисоблайди. Бу ҳақда у Бокудаги матбуот анжуманида маълум қилган.

Лавровнинг фикрича, «Европа Иттифоқининг русофоб айблови» ҳали бери йўқолиши даргумон. Унингча, европаликлар Иккинчи жаҳон уруши бошланишини эслатувчи йўлни танлашган, ўз вақтида «Гитлер Совет Иттифоқига қарши уришиш учун Европа давлатларининг кўп қисмини ўз байроғи остида тўплаган».

«Ҳозир ҳам Европа Иттифоқи ва НАТО биргаликда Россия Федерацияси билан уруш қилиш учун шундай замонавий коалицияни йиғишмоқда. Буларнинг барчасини диққат билан кўриб чиқамиз», — деди Лавров.

Вазирнинг қўшимча қилишича, Россия расмийлари «Европа Иттифоқининг хатти-ҳаракатларини» ва Украина ҳамда Молдовага ЕИга номзод мақоми берилганидан кейин уларнинг қадамини кузатадилар.

Эслатиб ўтамиз, 23 июнь куни ЕИ давлатлари раҳбарлари саммит чоғида Украина ва Молдовага ЕИга номзод мақомини беришга келишиб олдилар. Украина президенти Владимир Зеленский Россиянинг Украинага бостириб кириши бошланганидан бир неча кун ўтиб, мамлакатнинг Европа Иттифоқига кириши учун ариза берганди. Июнь ойида Россия президенти Владимир Путин Россия Украинанинг ЕИга киришига қарши эмаслигини айтган эди.