Канаданинг Квебек провинсиясида бўлиб ўтган G7 саммити доирасида АҚШ президенти Доналд Трамп ўз ҳамкасбларига нисбатан танқидлар ёғдиришда «очкўзлик» қилмади, дея ёзмоқда «The Wall Street Journal».

Мавжуд муаммоларни муҳокама қилиш чоғида Трамп бир нечта таҳдидли баёнотлар қилган.

Нашрнинг ёзишича, унинг иммиграция ва терроризм борасидаги таклифлари жуда қаттиқ бўлган.

«Сиз буни билишингиз керак, Эммануел, барча террорчилар Парижда», дея мурожаат қилган у Франция президенти Эммануел Макронга қарата.

Европадаги иммиграция ҳақида гапиратуриб, у Япония бош вазири Шинзо Абега мурожаат қилган: «Шинзо, сизда бундай муаммо йўқ, лекин хоҳласангиз сизга 25 миллион мексикаликни жўнатишим мумкин ва сиз тезлик билан лавозимингизни тарк этасиз».

Шунингдек, Европа комиссияси президенти Жан Клод Юнкер ҳам Оқ уй раҳбарининг танқидларидан четда қолмади. Трамп уни «даҳшатли қотил» дея баҳолаган.

Канаданинг Квебек провинсиясида 8-9-июн кунлари бўлиб ўтган бу галги саммит иштирокчилари орасидаги кескинлик билан ёдда қоладиган бўлди.

АҚШ президенти Доналд Трамп эса саммитнинг ёпилиш маросимидан аввал Канадани тарк этди ва якуний баёнотдан ўз исмини қайтариб олди.