АҚШнинг «Time» журнали Трамп – Путин учрашувини ўтказиш учун нега айнан Ҳельсинки танланганини таҳлил қилди. Бу ҳақда «Gazeta.ru» хабар бермоқда.

Биринчидан, айнан ушбу шаҳарда Ҳельсинки битими имзоланган. 1975 йили АҚШ президенти Жеральд Форд ушбу шаҳарда Совет иттифоқи коммунистик партияси марказий қўмитаси раиси Леонид Брежнев ҳамда 33 та мамлакат етакчиси билан совуқ уруш даврида узилган алоқаларни тиклаш мақсадида учрашган эди.

Бугун АҚШ ва Россия ўртасидаги муносабатлар илиқ эмаслигини инобатга олсак, Ҳельсинки иккала томон учун ҳам жуда маъқул жой экани аёнлашади.

Иккинчидан, «Time» журналига кўра, 1990 йили АҚШ президенти Жорж Буш ва СССР президенти Михаил Горбачёв ҳам айнан Ҳельсинкида учршган эди.

Учинчидан, Финландия НАТОга аъзо эмас. Шу боис унинг ҳудуди бетараф ҳисобланади. Шу боис бу ерда Америка президенти бемалол ҳар хил имо-ишоралар қилиши мумкин. Трамп Путин билан НАТО ҳудудидан ташқарида учрашади. Бу вазиятни НАТОга аъзо давлатлар раҳбарлари танқид қилишган эди.

Тўртинчидан, Трамп шу йил июль ойида Брюсселда ўтказиладиган НАТО саммитида қатнашади. Шундан сўнг у Буюк Британияга отланади. Мантиқан олиб қаралганда ҳам Трамп айнан Европада Путин билан учрашиши тўғри бўлади.

Бешинчи сабаб ҳам мантиқий. Бу сафар Россия етакчиси нуқтаи назаридан. Москвадан Ҳельсинкигача самолётда 2 соатлик йўл. Трамп билан учрашувдан бир кун аввал, яъни 15 июль куни Россияда футбол бўйича жаҳон чемпионати финали бўлиб ўтади. Путин «ЖЧ – 2018» спорт байрамининг ёпилишида қатнашади ҳамда Трамп билан учрашиш учун Ҳельсинкига етиб боришга улгуради.