Украинанинг собиқ бош вазири, «Баткившина» партияси етакчиси Юлия Тимошенко Украина президентлигига номзодлар рейтингида биринчи поғонани эгаллаб турибди. Амалдаги президент Пётр Порошенко эса иккинчи ўринда. Бу ҳақида «Рейтинг» социологик гуруҳи директори Алексей Антипович матбуот анжуманида хабар берган.

Украинада президент сайлови 2019 йилнинг 31 март куни бўлиб ўтади.

«Бизда Тимошенко сўровда 11,2 фоиз овоз тўплаб етакчилик қилаётгани ҳақида маълумот бор. Порошенко эса 9,4 фоиз овоз билан иккинчи ўринда», — дея маълумот берган Антипович.

Унинг гапига қараганда агар Порошенко Тимошенко билан иккинчи турга ўтадиган бўлса, фақат бир нечта вилоятда, жумладан Винница, Хмелницкий, Черновци ва Донецкда ғолиб чиқиши мумкин.

Сиёсий эксперт Алексей Минаков сўров натижаларини изоҳлар экан, «Ҳукумат ҳозир иккинчи тур учун номзод изламоқда, чунки Тимошенко (Порошенко учун) ноқулай номзод ҳисобланади», — деб фикр билдирган. Экспертнинг фикрича, «Оппозицион блок» раҳбари Юрий Бойко қулайроқ номзод. Бойко сўровда 7,1 фоиз овоз тўплаган. Аммо унинг сайловда ўз номзодини қўйиш-қўймаслиги аниқ эмас.

Социологик сўров ўтган йилнинг декабр ойида ўтказилган бўлиб, унда 30 минг киши қатнашган.