Ўзбек боксчиси «WBC Silver» камарини қўлга киритди
Хабар берганимиздек, Тошкентдаги «Ўзбекистон» спорт мажмуасида бокс бўйича профессионал жанглар ташкил этилди.
Бокс оқшомининг асосий жангида иккинчи ўрта вазн тоифасида енгилмас боксчимиз Азизбек Абдуғофуров вакант бўлиб қолган «WBC Silver» чемпионлик камари учун рингга кўтарилди. Унга россиялик тажрибали боксчи Дмитрий Чудинов (21-2-2, КО13) рақиблик қилди.
Рингда иккинчи рақам остида ҳаракат қилганига қарамай, Азизбек рақибини аниқ зарбалар билан қарши олди ва бутун жанг давомида устунлик қилди.
Ўн икки раундга мўлжалланган чемпионлик жанги ғолиби ҳакамлар берган очколар ҳисобига кўра аниқланди. Ҳакамлар бир овоздан 118:110, 118:110, 117:111 ҳисобида Азизбек Абдуғофуров ғалаба қозонганлигини эътироф этишди. Шу тарзда ҳамюртимиз «WBC Silver» камари соҳибига айланди.
Таъкидлаш лозимки, Азизбекнинг профессионал рингдаги жанглари сони 11тага етди ва у барчасида ғалаба қозонган. Шулардан учтасини муддатидан олдин якунлаган.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter