«AnTuTu» бенчмарки жамоаси Android-смартфонларнинг анъанавий ойлик рейтингини эълон қилди. Унда 2019 йилнинг январи сўнгигача савдога чиққан, яъни шу кунларда амалда бўлган энг кучли моделлар акс этган, деб хабар берди «Терабайт».

Рейтингдаги кучли учлик ўтган ойдагига нисбатан ўзгаришсиз қолган, зеро, янги мавсум флагманлари ҳали бозорга чиққанича йўқ. Nubia Red Magic Mars ўйинбоп смартфони кетма-кет иккинчи марта етакчи бўлиб турибди. Бу гал унинг бенчмаркдаги кўрсаткичи ўтган ойдагидан ҳам юқорироқ – 320 996 балл.

Рўйхатнинг иккинчидан то бешинчи поғонасигача бўлган ўринларни Kirin 980 процессорли Huawei флагманлари эгаллаган: Мate 20 (308 140 балл), Honor View 20нинг хитойча варианти – Honor V20 (306 567 балл), Mate 20X (304 203 балл) ва Honor Magic 2 (301 260 балл).

Шуниси қизиқки, хитойлик техногигантнинг Mate 20 Pro (298 659 балл) флагмани бу гал ўйинбоп Xiaomi Black Shark Helo (299 495 балл) моделидан ҳам пастлаб, еттинчи ўринга тушган. Буни AnTuTu мутахассислари шундай изоҳлашган: «фойдаланувчилар Pro-версияларнинг аксариятини ушбу бенчмаркда мувозанатга келтирилган режимда синаб кўришган; бу режимда қувватни тежаш учун самарадорлик сал чеклаб турилади».

Гувоҳи бўлганингиздек, январнинг энг зўр смартфонлари рўйхатидан яна OnePlus 6T(296 577 балл), Vivo NEX Ultimate (295 052 балл; яна битта номи – Vivo NEX S) ҳамда Asus ROG Phone (295 008 балл) ҳам ўрин олган.