O‘zbekiston Respublikasi Oliy sudi kuni kecha sobiq Bosh prokuror Rashid Qodirovga nisbatan tayinlangan jazoga izoh berdi. (Ma’lumingizkim, R. Qodirov 10 yil muddatga ozodlikdan mahrum qilinganidan tashqari  eng kam ish haqining 500 baravari miqdorida jarima jazosiga ham mustahiq etilgan).   

Izoh mazmunicha, ayrim ommaviy axborot vositalari va turli ijtimoiy tarmoq foydalanuvchilarining  jazo go‘yoki yengilroq  bo‘lgani xususidagi gap-so‘zlar asossiz. Hammasi qonun doirasida bo‘lgan. Shuningdek, alohida ta’kidlanadiki, R. Qodirovga nisbatan tayinlangan jazo bilan  xalq orasida «Ahmadboy nomi bilan tanilgan A. Tursunboyevga berilgan muddatni («Ahmadboy» 14 yilga  «kesilishi»dan tashqari  yana eng kam oylik ish haqining 400 baravari miqdorida jarima jazosiga ham tortilgan) taqqoslab,  turlicha xulosa chiqarish ham noo‘rin. «Ahmadboy»ning «ishida  12 mingga yaqin jabrlanuvchi qatnashgan hamda u qilmishiga yarasha jazo olgan. Rashid Qodirovga bog‘liq holat umuman boshqacha.  Sud hukmi chiqqan paytda R. Qodirov oltmishdan o‘tib bo‘lgan. O‘zbekiston Jinoyat kodeksining 50-moddasi 6-qismiga ko‘ra: «Ozodlikdan mahrum etishga hukm qilinayotgan ayollarga hamda oltmish yoshdan oshgan erkaklarga nisbatan tayinlanayotgan jazo muddati ushbu Kodeks Maxsus qismining tegishli moddasida nazarda tutilgan ozodlikdan mahrum etish eng ko‘p muddatining uchdan ikki qismidan ortiq bo‘lishi mumkin emas».   Demakki,  R. Qodirovga 10 yildan ortiq muddat berilishini qonun ko‘tarmaydi.

 Oliy sud izohining mazmuni shu.  Tushunarli.

Shunga qaramay «Qodirov ishi» bo‘yicha chiqarilgan hukmning izohtalab boshqa  nuqtalari ham borday. Bu haqda o‘tgan kungi maqolada qisman so‘z borgandi.   Kechagi izohdan  so‘ng  yana  qator savollar tug‘ildiki,  «Qodirov ishi» bo‘yicha, mayli, nomi aytilmasin,  necha nafar va qaysi toifadagi shaxslar jaburlanuvchi bo‘lib o‘tgan?    Shuningdek,  jinoiy guruhning ayrim a’zolari sud zalidan ozod etilgani ham  aytilmoqda. Shu mazmundagi gaplar  qanchalar asosli? Agar rost bo‘lsa, «og‘ir va o‘ta og‘ir jinoyatlar sodir etgan»likda ayblangan  guruhning qaysi a’zolariga ozodlikdan mahrum etish bilan bog‘liq bo‘lmagan jazo tayinlandi? Va qanday asoslarga ko‘ra?

 Guruh a’zolari  olgan poralar, yetkazgan zararlar miqdori-chi?

Zararlarning qanchasi qoplangan-qoplanmagani haqidayam jamoatchilikka ma’lumot berilishi ortiqchalik qilmasdi.

Yana bir gap. Sobiq Bosh prokuror va boshqalarga nisbatan hukm chiqqaniga ikki kun bo‘ldi. Demak, hukm hali qonuniy kuchga kirgani yo‘q. Unga (hukmga) nisbatan sudlanuvchilar shikoyat berishi ehtimoli ham yo‘q emas.  Shunga qaramay Oliy sud mazkur izohi bilan  hali kuchga kirmagan hukmni avvaldanoq tasdiqlab qo‘ymayaptimi? Bu hol qonun qarichiga to‘g‘ri keladimi? Bu bilan Oliy sud jinoyat qonunchiligining eng oddiy qoidasini qo‘pol ravishda buzmayaptimi?

Demak, yuqoridagi  izohtalab savollardan tashqari kechagi izohga ham izoh berilishi kerakday...