Xabar.uz - gazetaning internet talqini

TATUda ASA institutining o‘quv va maslahat markazi ochildi

Nu-York shahrida joylashgan ASA instituti Toshkent axborot texnologiyalari universiteti bilan ta'lim sohasida hamkorlik qilish taklifini bildirgan edi.

2010 yil dekabr oyida ASA instituti bilan Ta'lim sohasida o‘zaro hamkorlik Shartnomasi imzolandi. Ushbu shartnomada O‘zbekiston talabalarining mahalliy diplomlariga qo‘shimcha ravishda ASA institutining darajali dasturlariga ega bo‘lishlarida ko‘maklashish va maslahat berishni amalga oshirish maqsadida TATU qoshida Ta'lim va maslahat markazini tashkil etish, ushbu markazni ASA instituti tomonidan komputer va telekommunikatsiya jihozlari bilan ta'minlash masalalari ko‘zda tutilgandi.

Shartnomada ko‘zlangan maqsadlarni amalga oshirish yuzasidan muzokaralar olib borildi. Universitet binosidan markaz uchun joy ajratildi, ta'mirdan chiqarildi. ASA instituti tomonidan komputer va telekommunikatsiya jihozlari bilan ta'minlandi va "TATU-ASA o‘quv-maslahat markazi" tashkil etildi. Ushbu markazda ASAning qisqa muddatli va intensiv kurslarini yo‘lga qo‘yish, professor-o‘qituvchi va talabalar almashinuvini va boshqa manfaatli loyihalarni amalga oshirish kabi masalalar rejalashtirilgan.

O‘tgan haftada Toshkent axborot texnologiyalari universiteti katta majlislar zalida AQShning ASA instituti bilan Ta'lim sohasida o‘zaro hamkorlik Shartnomasi doirasida "TATU-ASA o‘quv-maslahat markazi"ning ochilishiga bag‘ishlangan tantanali marosim bo‘lib o‘tdi. Tadbirda ASA instituti rahbariyatidan tashkil topgan delegatsiya, universitet professor-o‘qituvchilari va talabalari ishtirok etdilar.

Ma'lumot o‘rnida:

ASA instituti yuqori darajali kasb yo‘nalishi bo‘yicha kadrlar tayyorlash dasturini yo‘lga qo‘yish uchun 1985 yili tashkil etilgan. Unda o‘qitish tizimi axborot texnologiyalari, komputerda dasturlash, tarmoqni boshqarish va xavfsizligini ta'minlash, biznes boshqaruvi, sog‘liqni saqlash, axborot texnologiyalari yo‘nalishlari bo‘yicha ta'lim tayyorlovi, kasbiy tayyorlov va amaliyot tajribalari asosida olib boriladi.