Innovatsiya vaziri Buyuk Britaniyaning «Wiley» kompaniyasi delegatsiyasini qabul qildi
O‘zbekiston Innovatsion rivojlanish vaziri Ibrohim Abdurahmonov Buyuk Britaniyaning «Wiley» kompaniyasi vakillari bilan uchrashdi. Bu haqda vazirlikning «Facebook»dagi sahifasida xabar berildi.
«Daryo.uz» nashrining yozishicha, uchrashuv chog‘ida davlat ilmiy-texnik dasturini amalga oshirishda uzoq muddatli hamkorlikni o‘rnatish masalalari muhokama qilingan. Shuningdek, xalqaro ilmiy-tadqiqot ma’lumotlar bazalari va innovatsiyalardan foydalanish, ilmiy va yuqori malakali kadrlarni tayyorlashda hamkorlik masalalari ham muzokaralar markazida bo‘lgan.
Uchrashuv yakuniga ko‘ra, o‘zbek olimlari, mutaxassislari, talabalari uchun «Wiley»ning ilmiy-tadqiqot bazasi va kutubxonasidan foydalanish imkoniyatini yaratish uchun birgalikda ish olib borish bo‘yicha kelishuvlarga erishildi.
Ingliz kompaniyasi O‘zbekistonda hamkorlikda master-klass va treninglar tashkil qilish yuzasidan hamkorlikka qiziqish bildirdi. Bunda «Wiley»ning Ilmiy-tadqiqot Akademiyasini jalb qilish ko‘zda tutildi.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter