2018 yil 20 yanvardan 21 yanvar kuniga o‘tar kechasi 1995 yilda tug‘ilgan Abdujalilov Doniyor Lutfulla o‘g‘li, Uchtepa tumani hududida joylashgan uyning yonida fuqaro Xakimova Farzona Xusanovnaga (ism-familiyasi o‘zgartirilgan) tegishli bo‘lgan «Neksiya-3» rusumli avtomashinasi qarovsiz qoldirilganligidan foydalanib, uni olib qochgan. Bu haqda Toshkent shahar IIBB saytida xabar berilgan.

Toshkent shahar IIBB xodimlari tomonidan o‘tkazilgan tezkor-qidiruv tadbirlari davomida, D.L.Abdujalilov Chilonzor tumani hududida ushlanib, undan F.X.Xakimovaga tegishli bo‘lgan avtomashina rasmiylashtirib olingan.

Mazkur holat yuzasidan Uchtepa tumani IIB huzuridagi Tergov bo‘limi tomonidan O‘zbekiston Respublikasi JKning 267-moddasi 1-qismi (transport vositasini olib qochish) alomatlari bilan jinoyat ishi qo‘zg‘atilgan.

Hozirda dastlabki tergov harakatlari davom ettirilib, uning boshqa jinoyatlarga aloqadorligi tekshirilmoqda.

Jabrlanuvchining anketa ma’lumotlari o‘zgartirilgan bo‘lib, familiya va ismlarning xar qanday o‘xshashligi tasodifiy xarakterga ega.