«O‘zbektelekom» kompaniyasi bosh direktorligiga Farhod Ro‘ziyev tayinlangani haqida xabarlar chiqqan edi. Bugun, 26-fevral kuni kompaniya saytida bu bo‘yicha rasmiy axborot tarqatildi.

Qayd etilishicha, Ro‘ziyev Farhod Zafarovich «O‘zbektelekom» AK bosh direktori v.v.b etib tayinlangan va 2017-yilning fevralidan buyon ushbu lavozimda ishlab kelayotgan Shuhrat Qodirovning o‘rnini egallagan.

Farhod Ro‘ziyev 1979-yil 26-mart kuni tug‘ilgan. 2000-yili Jahon iqtisodiyoti va diplomatiya universitetining Xalqaro iqtisodiy aloqalar fakultetini tamomlagan.

Mehnat faoliyatini 2000-yili «Sarkor Telecom» kompaniyasida boshlagan va kompaniya menejerligidan bosh direktorligigacha ko‘tarilgan.

2007-yilda «Winncom Technologies Corp» kompaniyasining Markaziy Osiyo va Ukrainadagi biznesini rivojlantirish bo‘yicha hududiy direktori vazifasida ishlagan.

2011-2012-yillarda «O‘zbektelekom» AKga ishga kirib, «Uzonline» loyihasiga rahbarlik qilgan, shuningdek «Uzmobile» filiali direktori bo‘lgan.

O‘zbek, rus va ingliz tillarida erkin so‘zlasha oladi.

Uylangan, ikki nafar farzandi bor.