Janubiy Koreya sog‘liqni saqlash va ijtimoiy ta’minot vazirligi grippga qarshi majburiy vaksinatsiyadan so‘ng 13 kishi vafot etgani haqida xabar berdi. Departament ushbu ma’lumotni bugun, ya’ni 22-oktyabr kuni e’lon qildi.

Ta’kidlanishicha, dastlabki o‘lim holati 16 oktyabr kuni Inchxon shahrida qayd etilgan: 17 yoshli o‘quvchi vaksinatsiyadan ko‘p o‘tmay hayotdan ko‘z yumgan. So‘ngra shunga o‘xshash holat Seul, Kengido provinsiyasi va boshqa hududlarda ham kuzatilgan. Vafot etganlarning aksariyati — keksa yoshdagi kishilar, deb yozadi TASS.

Shifokorlarning ma’lum qilishicha, kamida oltita holatda tergov jarayonida vaksinatsiya bilan odamlarning o‘limi o‘rtasidagi to‘g‘ridan-to‘g‘ri bog‘liqlik aniqlanmagan. Eng keng tarqalgan noxush ta’sirlaridan biri bo‘lgan anafilaktik shok ehtimoli tekshirilganda manfiy natija ko‘rsatgan. Ustiga-ustak, vaksinalarda toksik moddalar topilmagan.

Shu munosabat bilan mamlakat sog‘liqni saqlash vazirligi bu yil COVID-19 pandemiyasi fonida majburiy amalga oshirilayotgan grippga qarshi vaksinatsiyani to‘xtatishga asos yo‘qligini aytmoqda.

Avvalroq hukumat Janubiy Koreyada grippga qarshi taxminan 5 mln doza vaksina noto‘g‘ri saqlangani bois buzilgan bo‘lishi mumkinligini aniqlashgandi. Biroq bu ularning sifati va samarasiga ta’sir qilmagan degan qarorga kelishgan.