27-sentyabr kuni Qozog‘iston prezidenti Qosim-Jo‘mart To‘qayev Dauren Kosanovni mamlakat mudofaa vaziri lavozimidan ozod qildi. Tegishli farmon davlat rahbarining rasmiy resurslarida e’lon qilingani xabar qilindi.

Kosanov mudofaa vaziri lavozimiga 2025-yil 8-iyunda tayinlangan. 2026-yil sentyabr oyi boshida esa yangi hukumat tarkibi shakllantirilganidan so‘ng ushbu lavozimga qayta tayinlangan edi.

Shuningdek, prezident farmoni bilan Aydos Sakenovich Mirzaxmetov Qozog‘iston mudofaa vaziri etib tayinlangan. Kosanovning lavozimdan ozod etilishi Kaspiy dengizidagi harbiy mashg‘ulotlar vaqtida 14 nafar harbiy halok bo‘lganidan bir necha kun o‘tib sodir bo‘ldi.

24-sentyabr kuni Mangistau viloyatida o‘tkazilgan «Xazar qorg‘ani — 2026» mashg‘ulotlari vaqtida harbiy xizmatchilar «Qaysar» kateridan qirg‘oqqa tushirilayotganda dengizga oqib ketgan.

Jami 17 nafar harbiy xizmatchi suvga tushib ketgan, uch nafari qutqarilgan, 14 nafari halok bo‘lgan. Harbiylar qirg‘oqqa tushirilayotgan paytda ob-havo sharoiti keskin yomonlashgani va shamol kuchaygani xabar qilingan.

Hodisa yuzasidan Qozog‘iston Jinoyat kodeksining 453-moddasi 2-qismi va 465-moddasi bo‘yicha jinoyat ishi qo‘zg‘atilgan. 25-sentyabr kuni mamlakatda milliy motam kuni deb e’lon qilingan.

Hodisa ortidan Mudofaa vazirligining besh nafar mansabdori qo‘lga olingan. Ular orasida Qurolli kuchlar Harbiy-dengiz kuchlari bosh qo‘mondonining birinchi o‘rinbosari — shtab boshlig‘i, ikki harbiy qism komandiri, dengiz piyodalari rotasi komandiri hamda kater komandiri bor.

To‘qayev, shuningdek, mudofaa idorasidagi holatni har tomonlama tekshirish uchun maxsus komissiya tuzishni topshirgan. Kaspiyda halok bo‘lgan harbiy xizmatchilar davlat mukofotlariga taqdim etilgan.

Tergov doirasida besh mansabdorga nisbatan ko‘rilgan choralar hodisa bo‘yicha qabul qilingan javob choralarining bir qismi sifatida qayd etilgan.