Хабарлар тезкор Телеграм каналимизда Обуна бўлиш ×

Доминика Республикаси Кубанинг машаққатларидан фойда изламоқда

Доминика Республикаси Кубанинг машаққатларидан фойда изламоқда

Фото: «Tendenciasrd.com»

«Халқаро валюта жамғармаси ҳисоботига кўра, Куба кундалик эҳтиёж учун энг зарур маҳсулотларни амаллаб эплаётган бир пайтда Доминика Республикаси иқтисодиётида йиллик 5 фоизлик ўсиш кузатилди. Умуман эса охирги беш йил давомида Доминика иқтисодиёти йиллик ўртача 6,6 фоизлик суръатдан пасаймади — бу бутун Лотин Америкасидаги энг зўр кўрсаткич»,деб ёзмоқда Испаниянинг «ABC» нашри.

Рауль Кастро ва Барак Обама маъмурияти яқинлашуви натижасида Куба иқтисодий очиқликка юз буриб, атак-чечак қила бошлагани яқин қўшниси бўлмиш Доминика Республикасига кўпроқ рағбат бўлганди. Доминикаликлар Кариб минтақасида муҳим логистика тугунига айланиш учун Куба билан кураш қаттиқ бўлишини англаган ҳолда бўлғуси рақобатга жиддий киришиб кетишди.

Фото: «Superdupergames.co»

Дональд Трамп келганидан кейин Кубага муносабат яна эски ўзанига қайта бошладики, бу доминикаликларга ҳам вақтдан ютиш, ҳам Вашингтон хоҳишига қараб Пуэрто-Рикога тақдим этилаётган иқтисодий сиёсат соҳасидаги «бонуслар»га шерик бўлиш, қолаверса, Гаитининг қурбсизлигидан фойдаланиб қолиш каби имкониятларни тақдим этди. Хуллас, бугунги кунда Катта Антиль ороллари давлатлари орасида айнан Доминика Республикаси ўз тараққиётини белгилай олиш даражасида имкониятларга эгадек.

Аҳолиси 11 миллион кишилик бу мамлакатда сиёсий ва иқтисодий барқарорлик ҳукм сурмоқда. Охирги беш йилда инфляция ўртача 2,5 фоизда сақланиб туриши, ишсизлик 2018 йилда 5,7 фоизгача қисқаргани (мамлакат иқтисодиётининг катта ярми норасмий саналади) бир қарашда кўз ўнгимизда Данило Медина бошқараётган «Кариб ороллари иқтисодий мўъжизаси»ни гавдалантиради.

Шунга қарамай, Доминика Республикаси чинакамига тараққиёт йўлига чиқиб олди дейишга ҳали эрта. Масалан, Санто-Домингодаги автоном университет ўқитувчиси, сиёсий коммуникациялар бўйича мутахассис Леандро Кампос худди шундай фикрда. Унинг айтишича, Медина жамоасига «иқтисодий мўъжиза» мамлакатни халқаро маркетинг мақсадларида кўз-кўз қилиш учун керак. Кампоснинг фикрича, йиллик 6 фоизлик иқтисодий ўсиш асло аҳоли турмуши даражаси сезиларли ўсаётганини англатмайди, ҳолбуки, расмий статистика  (42,2 фоиздан 22,7 фоизга камайган) охирги олти йилда қашшоқликка қарши кураш зўр кетаётганига шоҳидлик берса-да.  

«Бу мамлакатда коррупциянинг қўли етиб бормаган жой йўқ: сўровлар борган сари бу аччиқ ҳақиқатни исботламоқда. Илгари коррупция фуқароларни ташвишга солаётган нарсалар орасида ўнинчи ўринда ҳам эмас эди, ҳозир-чи — ё иккинчи ё учинчи ўринда», — таъкидлади эксперт.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг