Украина ҳамда Россия президентлари Петро Порошенко ва Владимир Путин музокаралар столига ўтиришлари лозим, акс ҳолда Донбасс муаммоси ҳал бўлмайди, дея фикр билдирди Украинанинг биринчи президенти Леонид Кравчук «Украинская правда» газетасига берган интервьюсида. Бу ҳақда «segodnya.ua» сайти хабар бермоқда.

«Россия бизни ўзининг оёқлари остида кўришни хоҳлайди. Ўшандагина биз яхшимиз. У 150 йилдан буён курашиб келмоқда. Босим ўтказиш, куч билан таҳдид қилиш ва ўзини бировлардан устун қўйишдан бошқа нарсани билмайди. Бу уларнинг табиати. Ғарб эса бундай муносабат қилмайди. Албатта, мен уларни жуда беғараз ва бизни яхши кўришади дея олмайман» деган Кравчук.

Шунингдек, у Путиннинг Минск келишуви шартларини бажаришини кутмасликни ва у билан президент даражасида музокаралар столи атрофида гаплашишга чақирди.

Мен биламан, Ғарбнинг аралашувисиз бу муаммони ҳал қилиб бўлмайди. Аммо, Путин музокаралар столига келиши керак, чунки Донбасда уларнинг таъсири кучли. Порошенко билан музокара олиб бориши лозим. Аммо, у Порошенко билан гаплашишни хоҳламайди. Мен буни унинг гапларидан биламан. Хоҳламаслик нимани англатади? Биз шундай президентни танладик. Ёки сен учун бошқасини танлашимиз лозим эдими? Кимни танлаш, бу бизнинг ҳуқуқимиз. Ўтиринг ва келишиб олинг. Чунки гап одамлар, халқлар тақдири ҳақида кетмоқда. Путин кўрди, Қримдаги ҳолат юз бермади ва юз бермайди ҳам. Биз охиригача ҳимоя қиламиз. Ўйлайманки, бу нарса уни ўйлаб кўришга мажбур қилади", дея таъкидлади собиқ президент.

Аввалроқ, Украинанинг фавқулодда ва мухтор элчиси Роман Безсмертний ҳам Россия ва Украина Донбасс борасида тўғридан тўғри музокаралар бошлаши зарурлиги ҳақида гапирган эди.

Ўз навбатида Украина президенти Петро Порошенко Россия президентидан Украинада ўз қўшинларини олиб чиқиб кетишни талаб қилган эди. Давлат раҳбари Путинни агрессор деди: «Бу ерда агрессор биз эмас. Агрессор - бизнинг юртимизда қўшини билан турган Путин. Бизга бошқа нарса керак эмас, марҳамат қилиб қўшинларингизни олиб чиқиб кетинг юртимиздан».

Эслатиб ўтамиз, Украинанинг шарқий Донбасс вилоятида 2014 йилдан буён нотинчлик ҳукм сурмоқда.