Чеченистонда уя қуриб, бир қатор терактларни амалга оширган халқаро террорчи Хаттоб Россия махсус кучлари томонидан заҳарлангани эълон қилинди. Бу ҳақда «Росбалт» агентлиги жараёнда бевосита қатнашган манбага асосланиб хабар бермоқда.

Террорчилар бошлиғи узоқ вақт таъқиб қилинганига қарамай қўлга тушмаган. Чунки у алоқа воситаларига ишонмаган, ҳар доим турар жойини ўзгартириб турган. Ташқи олам билан алоқани фақат хатлар орқали амалга оширган. Хатлар унга шундай мураккаб тарзда қўлма-қўл қилиб етказилганки, бу занжир орқали террорчини топишнинг иложи йўқ эди.

Кейинчалик у ҳақдаги ишончи ахборотга катта мукофот пули жорий қилинганидан сўнг хат ташувчилардан бири ҳамкорликка рози бўлган. 2002 йилнинг март ойида хат етказувчи Саудия Арабистонидан мактуб келганини билдирган. Шундан сўнг Москвадан зудлик билан етиб келган кимёгар мутахассис хат қоғозини ўта кучли заҳар билан тўйинтиради. Кейин конверт қайта муҳрланиб, занжир орқали жўнатиб юборилади.

Кейинчалик қўлга тушган Хаттобнинг тансоқчиларидан бири террорчининг хатни олгани ва ўқиган заҳоти гулханга улоқтирганини айтади. Заҳар унга учинчи суткадан кейин таъсир қила бошлайди ва террорчининг аҳволи кескин ёмонлашади – оғзидан кўпиклар келиб, 20 мартда жон беради. 

Аввалига атрофдагилар уни қўзиқориндан заҳарланган деб ўйлашади. Аммо кейинчалик хатга қўл теккизган яна беш кишининг ўлганидан сўнг заҳарланиш уюштирилганини англаб етишади.