Ҳозирда мамлакатимизда тадбиркорлик соҳасига катта эътибор берилмоқда. Тадбиркорлик фаолиятини эндигина бошлаганлар учун ҳам барча шарт-шароитлар яратилган.

Кичик ва ўрта тадбиркорлик билан шуғулланувчилар сони йил сайин ортмоқда. Айниқса, оилавий тадбиркорлик ишини олиб борувчилар сони ҳам. Улар орасида ўзи яшаб турган уй-жойларида фаолият юритаётганлари ҳам бор. Бироқ бу соҳага яқиндагина кириб келган тадбиркорлар ўзлари яшаб турган уй-жойларида тадбиркорлик фаолиятини олиб бориш мумкинлиги бўйича маълумотга эга эмас.

«Оилавий тадбиркорлик тўғрисида»ги Қонуннинг 16-моддасида оилавий корхонанинг фаолияти амалга ошириладиган жой бўйича шундай дейилган: «Оилавий корхона иштирокчиларига мулк ҳуқуқи асосида ёки бошқа қонуний асосда тегишли бўлган тураржойлар ва яшаш учун мўлжалланмаган жойлар, шу жумладан, ишлаб чиқариш, хўжалик бинолари ва бошқа иморатлар оилавий корхона фаолияти амалга ошириладиган жойдир.

Оилавий корхона иштирокчиларига мулк ҳуқуқи асосида тегишли бўлган тураржойларни улардан оилавий корхона фаолиятида фойдаланиш мақсадида яшаш учун мўлжалланмаган жойларга айлантириш талаб қилинмайди, бундан фаолиятнинг айрим турлари учун қонун ҳужжатларида назарда тутилган ҳоллар мустасно».

Демак, оилавий тадбиркорлик билан шуғулланмоқчи бўлган шахслар юқоридагиларга риоя қилган ҳолда фаолиятларини бошлашса, ҳеч қандай қийинчиликларга дуч келмасликлари аниқ.