Ўзбекистонда ижтимоий тармоқлар ва мобиль дастурлар орқали ўзгаларнинг пластик карталаридаги маблағларни ўзлаштириб олган киберфирибгарлар қўлга олинди. Бу ҳақда Ягона умумреспублика процессинг марказига таяниб, «Spot» хабар берди.

«Яқинда ижтимоий тармоқлар ва мессенжерлар орқали пластик карталардан пул ўғирланаётгани ҳақида хабар берилганди. Кўплаб жабрланувчиларнинг мурожаатидан сўнг кибержиноятчиликни аниқлаш борасида тергов бошланди ва кўп ўтмай фирибгарлар қўлга олинди», — дейилади хабарда.

Сирдарё вилоятида яшовчи Ўзбекистон фуқароси вирус дастурни яратиб, уни «Google Play»га жойлаштирган.

Мазкур дастурни кўчириб олган фойдаланувчилар дастурни очганида улардан 10 минг сўм талаб қилинган, акс ҳолда телефонини блоклаб қўйиш орқали таҳдид қилинган. Пул тўлангач, фойдаланувчига шубҳали рақамдан хабар келган.

«Бу фирибгар учун жабрланувчининг телефони ва «Telegram» аккаунтига кира олиши учун етарли бўлган. У click-бот орқали пулларни ечиб олган. Кибержиноятчини ва унинг ҳамтовоқларини аниқлаб, қўлга олишга эришилди», — дея таъкидланади хабарда.

Компания фуқароларнинг шахсий пластик карталарини ишлатишда тегишли хавфсизлик чораларини кўриш лозимлигини эслатади: картани хавфсиз жойда сақлаш, PIN-кодни учинчи шахсга ошкор қилмаслик, пластик карта тасвири туширилган суратларни ижтимоий тармоққа жойлаштирмаслик сўралади.