АТ «Алоқабанк» «UnionPay International» халқаро тўлов тизимининг «Йил кашфиёти-2018» мукофоти билан тақдирланди. Бу ҳақда АКТ вазирлиги ахборот хизмати хабар берди.

«Йил кашфиёти-2018» мукофоти 2019 йилнинг январь ойида «UnionPay International» компаниясининг Марказий Осиёдаги минтақавий раҳбари Чжанг Ченгдунг, АТ «Алоқабанк» бошқаруви раиси ўринбосари Н.Насретдинова ва ЯУПМ МЧЖ ҚК бош директори ўринбосари Ф.Нигматовлар иштирокида «Алоқабанк» бош офисида тантанали равишда топширилди.

Ўтган йилнинг октябрь ойида АТ «Алоқабанк» «UnionPay International» ва «UzCard» тўлов тизимлари билан ҳамкорликда контактсиз кобейж карталарини миллий миқёсда муомалага чиқариш бўйича уникал лойиҳани амалга оширганди. Бу картанинг энг асосий афзаллиги шундаки, ундан ҳам Ўзбекистонда, ҳам дунёнинг 170 та давлат ва минтақаларидаги «UnionPay International» халқаро тўлов тизимининг инфратузилмасида фойдаланиш мумкин. Кобейж карталаридан Ўзбекистон ҳудудида миллий валютадаги карта каби, чет элда эса тезкор конвертация эвазига хорижий валютада тўловлар ўтказиш ва банкоматдан нақд пул ечиш учун фойдаланиш мумкин.

Ҳозирги вақтда АТ «Алоқабанк» томонидан 30 мингга яқин контактсиз кобейдж пластик карталари муомалага чиқарилган бўлиб, шу қисқа вақт ичида улар бўйича дунёнинг 24 та давлатида транзакциялар муваффақиятли амалга оширилди.

АТ «Алоқабанк» жорий йилда кобейж карталари орқали амалга ошириладиган хизмат турларини кенгайтиришни режалаштирган: интернет-дўконларда онлайн харид, электрон халқаро пул ўтказмалари ва бошқалар.

Яна бир маълумот: АТ «Алоқабанк» Ўзбекистонда рўйхатга олинган барча эмитент-банклар учун «UnionPay» кобейж карталари бўйича амалга оширилган операциялар бўйича ҳисоб-китоб банки вазифасини бажаради.