Андеррайтинг тизими Банк томонидан юридик ва жисмоний шахсларга ажратиладиган кредит ҳужжатларининг ортиқча бюрократик тўсиқларсиз, қисқа муддатда кўриб чиқилишини таъминлайди.

Банк тизимида Президентимизнинг 2020 йил 12 майдаги «2020-2025 йилларга мўлжалланган Ўзбекистон Республикасининг банк тизимини ислоҳ қилиш стратегияси тўғрисида»ги фармони ижросини таъминлаш мақсадида хизмат кўрсатишнинг замонавий стандартлари жорий қилинмоқда.
Халқаро молия корпорацияси тавсияларига асосан кредит ажратишнинг марказлаштирилган – андеррайтинг тизимига ўтказилиши бу борадаги ишларнинг амалий ифодасидир.

Сўнгги вақтларда замонавий банк амалиётига кенг татбиқ этилаётган андеррайтинг кредит олиш истагини билдирган потенциал қарздорнинг молиявий ҳолати ва унинг кредитни қоплай олиш имкониятини таҳлил қилишнинг бир қатор жараёнларини ўз ичига олган тизимдир.

Андеррайтинг кредит ажратиш жараёнининг шаффоф бўлишини таъминлаб, кредит бўйича масъул шахслар томонидан холислик тамойили асосида, шахсий манфаатлар иштирокисиз қарор қабул қилиш имкониятини яратади. Бу эса кредит ажратиш жараёнларида коррупциоген ҳолатларга йўл қўйилмаслигига хизмат қилади.

Ўзсаноатқурилишбанкда андеррайтинг тизимининг жорий қилиниши натижасида Банк мижозларининг кредит ҳужжатларини кўриб чиқиш ва хулоса беришдаги кўп босқичли тизимидан воз кечилиб, уларнинг филиал комиссияси муҳокамасига киритилиши бекор қилинмоқда.

2021 йилнинг январь ойидан бошлаб кичик бизнес ва хусусий тадбиркорларга модулли кредитлар ажратиш юзасидан қарор Банкнинг андеррайтерлар гуруҳи томонидан қабул қилиниши режалаштирилган.

Қайд этиш лозимки, Банк тизимида мижозларга янада қулайликлар яратиш ва уларга жозибадор кредит турларини тақдим қилиш мақсадида кредит ажратиш босқичлари 6 тадан 3 тага, муддати лойиҳа қиймати ва мақсадидан келиб чиқиб, 10 кундан 1 кунгача қисқартирилди, корхоналарнинг мулкчилик шакли, кредит мақсади, фаолият туридан келиб чиқиб қатор янги кредит маҳсулотлари жорий этилди.

Эслатиб ўтамиз, Ўзсаноатқурилишбанкда Халқаро молия корпорацияси билан ҳамкорликда Банкни халқаро стандартларга тўлиқ жавоб берадиган молия муассасасига айлантиришга қаратилган трансформация жараёнлари амалга оширилмоқда. Бунда Банк хизматларининг мижозга йўналтирилганлиги асосий мезонлардан бири ҳисобланади.

Банк Ахборот хизмати