Шўртан нефт ва газ қазиб чиқариш бошқармаси – Ўзбекистонда нефт ва газ соҳасида етакчи ишлаб чиқариш корхоналаридан бири бўлиб, ташкилий жиҳатдан «Ўзбекнефтгаз» АЖ таркибига кирувчи ишлаб чиқариш бўғинларидан бири ҳисобланади.

Бошқарманинг асосий ишлаб-чиқариш фаолияти қуйидагилардан иборат:

- газ қазиб олиш ва уни қайта ишлаш;
- нефт қазиб олиш;
- барқарорлашган газ конденсати ишлаб чиқариш;
- суюлтирилган газ ишлаб чиқариш;
- олтингугурт ишлаб чиқариш.

Шўртан нефт ва газ қазиб чиқариш бошқармасининг табиий газни қайта ишлашнинг асосий технологик қурилмалари Бош Иншоот ҳудудида жойлашган бўлиб, ер майдони 140,27 гектарни ташкил этади.

Ҳозирги кунда Шўртан нефт ва газ қазиб чиқариш бошқармасига қарашли 12та газ конлари мавжуд бўлиб, шунда уларнинг 11 тасидан («Шўртан», «Жанубий Тандирча», «Бузахур», «Шарқий Бузахур», «Чунағар», «Тарнасой», «Номозбой», «Зафар», «Ойдин», «Топичаксой», «Ёрмоқ») газ ва газконденсати қазиб чиқаришда фойдаланилмоқда.

«Шўртан» Бош Иншооти газни тайёрлаш ва қайта ишлаш қурилмаларида Шўртан нефт ва газ қазиб чиқариш бошқармасига қарашли газ конларидан ташқари «Гиссарнефтегаз», «Epsilon Development Company» ҳамда «Лукойл-Узбекистан Оперейтинг Компани» МЧЖ қўшма корхоналари томонидан етказиб берилаётган табиий газ ҳам қайта ишланади.

2019 йилда «Ўзбекнефтгаз» АЖ умумий режа кўрсатгичларининг бажарилишида Шўртан нефт ва газ қазиб чиқариш бошқармасининг улуши,

газ қазиб чиқариш бўйича – 26,8 %ни;
нефт қазиб чиқариш бўйича – 30,6 %ни;
конденсат ишлаб чиқариш бўйича – 25,5 %ни;
пропан-бутан аралашмасини ишлаб чиқариш бўйича – 35,7 %ни;
олтингугурт ишлаб чиқариш бўйича – 0,6 %ни ташкил қилди.

Шўртан нефт ва газ қазиб чиқариш бошқармасида ишлатилаётган мавжуд технологик қурилмалар бир неча ўн йиллардан буён ишлатилиб келинаётганлиги сабабли уларни реконструкция қилиш, технологик жиҳатдан янгилаш, шунингдек, маҳсулот ишлаб чиқаришни кўпайтириш мақсадида бир қанча инвестиция лойиҳалари амалга оширилмоқда.