Франция миллий тиббиёт академияси фахрий президенти Эммануэль Алан Кабанис Ўзбекистон раҳбарининг БМТ Бош Ассамблеясининг 75-сессиясидаги нутқига ўз муносабатини билдирди.

— Ўзбекистон Республикаси Президенти Ш.М.Мирзиёев БМТ Бош Ассамблеясининг 75-сессиясидаги нутқини коронавирус пандемиясига қарши ҳамкорликда курашиш ва тарқалишининг салбий асоратларини бартараф этиш масаласи билан бошлади. 2019 йилдан буён Франция миллий тиббиёт академияси фахрий президенти ва профессор сифатида Президент Шавкат Мирзиёев илгари сурган иккита асосий ташаббусни алоҳида таъкидламоқчиман. Биринчиси, пандемиялар даврида давлатларнинг ихтиёрий мажбуриятлари тўғрисидаги халқаро кодексни қабул қилиш ва ишлаб чиқиш ўз вақтида билдирилган ташаббус ҳисобланади, — деди Эммануэль Алан Кабанис.

У БМТ Бош Ассамблеясининг 75-сессияси вақтида ана шундай муҳим ва долзарб ғоя ташаббуси билан чиққани учун Ўзбекистон Президентини қўллаб-қувватлашини маълум қилди.

— Шавкат Мирзиёев халқаро ҳамжамиятнинг пандемияга қарши самарали курашиш бўйича барча ҳаракатларини, жумладан, зарур дори-дармон ҳамда вакциналар ишлаб чиқиш ва улардан кенг фойдаланишга қаратилган ташаббусларини қўллаб-қувватлаши катта аҳамиятга эга. Унинг фикрларини қўллаб-қувватлаган ҳолда шуни қўшимча қиламизки, Президент Шавкат Мирзиёев ушбу таклифни сил каби юқумли касалликлар ҳамда бошқа яхши таниш бўлган хасталикларга нисбатан ҳам қўллаши мумкин. Яқинда икки юз йил муқаддам ташкил этилган ҳамда 1820 йилдан буён Францияда бутун тиббиёт тартиб-интизомини бирлаштирган бизнинг Академиямизда аъзоларнинг навбатдаги коллегиал йиғилиши бўлиб ўтади. Унда мен Ўзбекистон раҳбарининг БМТ Бош Ассамблеяси 75-сессиясидаги нутқининг асосий фикрларини тақдим этмоқчиман, — деди фахрий президент.

Эммануэль Алан Кабанис, шунингдек, юртимиздаги, айниқса, ижтимоий-иқтисодий соҳадаги ўзгаришларни катта қизиқиш билан кузатаётганини таъкидлади.

— Ишончим комилки, ҳукуматнинг соғлиқни сақлаш соҳасидаги сиёсати аъло даражада, чунки мамлакатда COVID-19 билан зарарланган ва вафот этган беморлар сони нисбатан кам. Бу республикада олиб борилаёган профилактика ишлари самарадорлигидан далолат беради. Марказий Осиёнинг бошқа давлатлари ҳам пандемиянинг минтақа фуқаролари ҳаётига салбий таъсирини юмшатиш бўйича Ўзбекистон Президенти томонидан амалга оширилган чора-тадбирларни қўллаб-қувватлашига умид қиламиз, — деб сўзини якунлади Франция миллий тиббиёт академияси фахрий президенти.