Андроид қурилмалар учун Xabar.uz мобил иловаси. Юклаб олиш ×
IOS qurilmalar uchun Xabar.uz mobil ilovasi. Юклаб олиш ×

«Нафосат Оллашукурованинг руҳий ҳолати нисбатан барқарор» — Омбудсман

«Нафосат Оллашукурованинг руҳий ҳолати нисбатан барқарор» — Омбудсман

Фото: Видеолавҳадан скриншот

«Ўзбекистон Республикаси Олий Мажлисининг Инсон ҳуқуқлари бўйича вакили (омбудсман) тўғрисида»ги Ўзбекистон Республикаси Қонунига мувофиқ 2019 йил 21 октябрь куни Омбудсман томонидан тузилган мониторинг гуруҳи суд қарорига кўра 2019 йил 26 сентябрда Хоразм вилоятининг психоневрологик диспансерига даволаш учун жойлаштирилган фуқаро Н.Оллашукурова билан учрашди.

Мониторинг гуруҳи таркибида Омбудсман вакилларидан ташқари Ўзбекистон Хотин-қизлар қўмитаси вакиллари, «Эзгулик» инсон ҳуқуқлари жамияти раҳбари А. Ташанов ва «Нажот» ҳуқуқни ҳимоя қилиш ташкилоти раҳбари Х.Якубов, шунингдек, психиатрия соҳасида етакчи экспертлар қатнашди.

Мониторинг гуруҳи ташрифи давомида Н. Оллашукурованинг руҳий ҳолати нисбатан барқарорлигига ва мулоқот қила олишига ишонч ҳосил қилган.

Суҳбат давомида у ўзига тиббиёт муассасаси ходимларининг самимий муносабатда эканлигини ва унга нисбатан бирор-бир руҳий ёки жисмоний таъсир ўтказиш ҳоллари бўлмаганлигини қайд этган.

Н. Оллашукурова уни маъмурий жавобгарликка тортиш учун асос бўлган ўз хатти-ҳаракатлари юзасидан афсусда эканлигини билдирган.

«Мониторинг гуруҳида қатнашган тиббиёт ходимлари томонидан Н. Оллашукурованинг касаллик тарихини ўрганиши натижасида, унинг ташхиси касалликлар халқаро таснифи КХТ-10 мезонларига мос келишини ва унга даволаниш клиник симптоматикага мувофиқ тайинланганлигини кўрсатди», дейилади Омбудсман хабарида.

Ташриф вақтида мутахассислар бемор ҳолати нисбатан яхшиланганлигини қайд этган. Шу билан бирга, айни вақтда тушкунлик аломатлари сақланиб турганлиги ва белгиланган даволаш курсини давом эттириш зарурлиги таъкидланди. Диспансер врачлари томонидан белгиланган дори воситалари орасида инсоннинг руҳий фаолиятини пасайтирадиган кучли таъсир кўрсатувчи препаратлар йўқлиги маълум бўлган.

Н. Оллашукурова ота-онаси билан телефон орқали суҳбатлашди ва уларга ўзининг ҳолати, қулай муҳитда сақланаётганлиги ҳамда унга тиббиёт ходимлари ҳурмат билан муносабатда бўлаётганлиги ҳақида хабар қилди. Н. Оллашукурова тўрт маҳал иссиқ парҳез таом билан таъминланган.  

Суҳбат вақтида Н. Оллашукурова юқорида баён этилганлардан ташқари ўзининг моддий аҳволидан хавотирда эканлигини ва даволангандан сўнг, ишга жойлашиш истагини билдирган.

Мониторинг гуруҳи Н. Оллашукурова билан учрашган вақтда унинг акаси Тожимурод ҳам иштирок этган.

Эслатиб ўтамиз, октябрь ойи бошларида хоразмлик блогер Н. Оллошукурованинг руҳий асаб касалликлари диспансерига ётқизилгани ҳақида хабар берилганди.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг