Хабарлар тезкор Телеграм каналимизда Обуна бўлиш ×

«Нон учун» компенсация – кимга ва қанча?

«Нон учун» компенсация – кимга ва қанча?

Фото: «Xabar.uz»

Молия вазирлиги Пенсия жамғармасининг ун ва қолипли нон олиш учун компенсация берилиши тўғрисидаги  тушунтиришини эълон қилди, деб хабар бермоқда «Норма».

Вазирлар Маҳкамасининг «Дон, ун ва нон етказиб бериш тизимига бозор механизмларини тўлиқ жорий этиш чора-тадбирлари тўғрисида»ги қарори (14.10.2019 йилдаги 866-сон) билан ун нархининг давлат томонидан тартибга солиниши бекор қилинди.

2019 йил 1 октябрдан бошлаб кам таъминланган оилаларга ун ва қолипли нон харид қилиш бўйича харажатларни қоплаш учун тўланаётган пул компенсацияси миқдори оширилди: илгари БҲМнинг 10% (22 300 сўм) белгиланган эди, 2019 йил 1 октябрдан ойига 50 000 сўм тўланади. Компенсация олувчилар тоифаси сони 9 дан 11 гача оширилди, шу туфайли 1 октябрдан компенсация олувчиларнинг умумий сони 18,5%га – 2 млн кишигача (оила) ошди.

Тўлов суммалари ошганлигини ҳисобга олган ҳолда Молия вазирлиги октябрдан декабргача бўлган даврда, декабрь ҳам ҳисобга киритилади, компенсация олувчилар учун 189 млрд сўм миқдорида қўшимча маблағ ажратилишини таъминлади (125 млрд – Пенсия жамғармаси линияси бўйича реципиентлар ва 64 млрд – фуқароларнинг ўзини ўзи бошқариш органлари орқали). Умуман олганда, 2019 йилда компенсация тўловлари учун Давлат бюджетидан 604 млрд сўм йўналтирилади.

Компенсация тўловлари юзасидан назорат қуйидаги тартибда амалга оширилади. Пенсия жамғармасида пенсия ва нафақа олувчиларнинг ягона ахборот базаси ишлаб турибди, унда компенсация олишга ҳақли бўлганларга автоматик тарзда тўлов тайинланади. Ҳар ойнинг 3-санасигача дастурий мажмуа ёрдамида қайдномалар шакллантирилади ҳамда «Халқ банки» АК ва тижорат банкларининг тегишли филиалларига электрон шаклда юборилади.

Тўловни пластик карточкага оладиганларга маблағлар ҳар ойнинг бошида уларнинг ҳисобрақамларига автоматик равишда ҳисоблаб ўтказилади. Нақд шаклдаги компенсациялар «Халқ банки» АКнинг кўчма кассалари томонидан фуқароларнинг ўзини ўзи бошқариш органлари биноларида пенсия тўлови билан бир вақтда тўланади.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг