Президентнинг парламентга мурожаатномасини катта қизиқиш билан кузатдик. Жуда хаяжонли дақиқалар. Президент кўнглимиздаги, тилимиздаги гапларни айтаяптики, гўёки давлат раҳбари биз мансуб бўлган виртуал оламни доим кузатиб, муҳокамаларимизда иштирок этаётгандек, биз билан ёнма-ён, ҳамфикрдек.

Тўрт соат давом этган мурожаатда ҳаётимизнинг қарийб барча жабҳаларидаги муаммо ва масалалар, режа ва мақсадлар ўрин олган. Ушбу маърузани Ўзбекистоннинг яқин келажаги аниқ-ойдин кўрсатиб берилган иш-ҳаракатлар режаси, дастури деб аташ мумкин. Шунингдек, бу халққа, тадбиркорларга енгиллик, қулайликлар тақдим этиш билан бирга, барчага бирдек масъулият, мажбуриятлар юкланганини ҳам инкор қилиб бўлмайди. Оддий мисол: йўл-патрул ходимлари камералар билан таъминланади, ЙПХ инспектораларининг камерасиз ҳайдовчилар мулоқот қилиши тақиқланади, деган таклиф илгари сурилди. Бу бир қараганда ЙҲХБ инспекторлари орасида коррупция ҳолатларининг чекланишига хизмат қилишини англатади. Аслида йўл ҳаракати қоидаларини писанд қилмайдиган, йўлларда бошқа ҳайдовчилар ва пиёдаларнинг ҳақига хиёнат қиладиган қоидабузарларга нисбатан кескин чоралар кўрилиши ҳақидаги жиддий огоҳлантиришдир.

Ёки тадбиркорларга берилаётган имкониятларни айтайлик. Бу ерда юзаки англаш мумкин бўлган ҳақиқат тадбиркор униб-ўссин, ривожлансин, фаолиятини кенгайтирсин ва давлат ривожига ўз ҳиссасини қўшсин, деган ғояни илгари суришдан иборат. Масалага чуқурроқ қарайдиган бўлсак, тадбиркор қанча бойиса шунча кўп солиқ тўлайди, одамларни кўпроқ иш билан таъминлаб, ойлик-маошларини кўтаради. Йирик тадбиркорлик субъектлари турли инфратузилмалар, коммуникация хизматларидан фойдаланади, бир сўз билан айтганда давлат ғазнасига тушаётган маблағлар миқдори ошади. Бу ўз навбатида мамлакатнинг комплекс ривожланиши, мавжуд муаммоларни тез ва самарали бартараф этиш учун етарли маблағ ва кучларни сафарбар этишига мустаҳкам замин яратади.

Бугунги маърузада биринчи бўлиб муаммолар санаб ўтилиб, сўнгра уларга ечим тақдим этилган экан, барчамиз бошқача яшашга ўзимизни тайёрлашимиз ҳам керак ва зарур. Чунки Президент айтди: «Бу йил оғир йил бўлади». Агар оғирни елкамизга олишни истамасак, қийинчиликлардан қочсак аҳволимиз ўнгланмайди.