Ўзбекистонда эркин конвертацияга йўл очилгач, валюта борасидаги муаммолар ўз ечимини топиб улгурди. Айниқса, оддий халқ ва тадбиркорлар энди бемалол чет эл валютаси билан муомала қилиши мумкин.

Лекин шундай ҳолатлар ҳам кузатиляптики, бунга асло кўз юмиб бўлмайди. Банклар фаолиятида конвертация очилиши баъзи ҳолларда ўзига хос фожиага айланиб кетди. Айни шу масалада Бухоро вилоятидан таҳририятимизга мурожаат келиб тушди. Унда «Қишлоққурилишбанк»нинг нотўғри ва адолатсиз сиёсатидан азият чекиб, хонавайрон бўлаётган тадбиркор ҳақида сўз боради. Банк раҳбарияти бир тадбиркорнинг касодга учрашини интизорлик билан кутаётгандек ва тезроқ унинг гаровдаги мол-мулкини ҳам мусодара қилишни истаётгандек гўё...

Воқеани ўрганиш учун ижодий гуруҳимиз ходимлари Бухорога бориб-келишди. «Қишлоққурилишбанк»нинг Бухоро минтақавий филиали фаолиятидаги қинғирликлар, қонунбузилиш ҳолатлари, тадбиркорларнинг ҳақ-ҳуқуқлари поймол бўлаётгани юзасидан журналист суриштируви ўтказилди.

Суриштирув натижасида ана шу кирдикорлар, жойларда банк ва тадбиркор ўртасидаги айрим оғриқли муаммолар юзага қалқиб чиқди. Яқин кунларда мазкур журналистлик суриштируви натижаларини сайтимиз орқали эълон қиламиз.