Андроид қурилмалар учун Xabar.uz мобил иловаси. Юклаб олиш ×

Шаҳарларда қурилаётган арзон уй-жойлардан олиш учун нима қилиш керак?

Шаҳарларда қурилаётган арзон уй-жойлардан олиш учун нима қилиш керак?

Фото: ЎзА

Ҳозирда Ўзбекистон бўйлаб шаҳарларда арзон уй-жойлар қурилмоқда. Табиийки, савол туғилади: «Уни кимлар олиши мумкин, аризани кимга топшириш керак?». Ушбу саволларга Адлия вазирлигининг «Ҳуқуқий ахборот» каналида жавоб берилди.

Вазирлар Маҳкамасининг 2017 йил 16 январдаги 14-сон қарорига асосан, шаҳарларда қурилаётган 5, 7 ва 9 қаватли арзон кўп квартирали уйлардаги квартираларни жисмоний шахсларга бириктириш туман ҳокимликларида тузилган ҳудудий комиссия томонидан амалга оширилади.

Кўп квартирали уйлардан квартира сотиб олиш учун турар-жой шароитларини яхшилашга муҳтож бўлган жисмоний шахс ҳудудий комиссияга (ҳокимиятда жойлашган) қуйидаги ҳужжатларни тақдим этади:

— ариза;

— қарз олувчининг (биргаликда қарз олувчиларнинг) молиявий ҳолатини тасдиқлайдиган ҳужжатлар;

— уй-жой шароитларини яхшилашга муҳтож бўлган жисмоний шахснинг қуйида кўрсатилган мезонлардан бирига мувофиқлигини тасдиқлайдиган ҳужжатлар:

✳️ ўз уй-жойининг йўқлиги ёки эскирган уйларда яшаш;

✳️ бир уйда (бир квартирада) бошқа оила ёки бошқа оилалар билан биргаликда яшаш;

✳️ кўп болали оила;

✳️ она (ота)нинг тўлиқ бўлмаган оилада болани (болаларни) тарбиялаши;

✳️ ариза берувчининг оила аъзолари орасида сурункали касалликнинг оғир турларидан азоб чекувчи алоҳида хонада яшашга муҳтож бўлган шахсларнинг мавжудлиги;

✳️ оила таркибида биринчи гуруҳ ногирони мавжудлиги;

✳️ турар-жой майдонининг қонун ҳужжатларида назарда тутилган турар-жой майдонининг ижтимоий нормасига мувофиқ эмаслиги;

✳️ таянч докторантуранинг 2-курсидан бошлаб, олий таълимдан кейинги таълим институтида таҳсил олаётган докторантлар.

Ҳудудий комиссия ҳар йили:

— жорий йил давлат дастури доирасида қурилаётган кўп квартирали уйлардаги барча квартираларни бириктиришни 1 февралгача бўлган муддатда тугаллайди;

— бўлажак йилда қуриладиган кўп квартирали уйдаги барча квартираларга потенциал қарз олувчиларнинг тўлиқ рўйхатини 1 апрелгача банкка тақдим этади.

Жисмоний шахс дастлабки бадал маблағларини унга квартира бириктирилгандан кейин 60 календарь кундан кечикмай 20406-сон алоҳида жамғарма депозит ҳисоб рақамига тўлаши шарт.

Квартира қийматининг камида 25 фоизи миқдоридаги дастлабки бадал тўланмаган тақдирда ҳудудий комиссиянинг квартирани жисмоний шахсга бириктириш ҳақидаги протокол қарори ўз кучини йўқотади.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг