Шимолий Корея қаттиқ изоляцияга таяниб, ташқи дунё билан йўловчилар алоқасига чек қўйди. Борди-ю, мамлакатда коронавирус бўлса ҳам, фақат алоҳида ўчоқлари бўлиши мумкин, деб ёзади «Kp.ru».

«Дарҳақиқат, Шимолий Кореяда COVID-19 билан зарарланишни расман тасдиқловчи бирорта ҳам далил йўқ. Лекин бу унинг у ерда, ҳақиқатан ҳам, йўқлигини англатмайди. Aммо алоҳида ўчоқлар бўлганда ҳам, эҳтимол, улар маҳаллий характерга эга», — деди Сеулдаги Кунмин университети профессори Aндрей Ланьков.

Ўз навбатида, зарарланишлар кўп бўлганида эди, мамлакат буни яшира олмасди. Яқинда Пхеньян ЖССТ билан мамлакатга 1,7 миллион доза бепул вакцина етказиб бериш бўйича музокаралардан воз кечишга қарор қилди. Бу шуни англатадики, вазият мураккаб эмас.

Қайд этилишича, қаттиқ карантинга таянилган. Шимолий Корея ҳукумати эса бу борада чинакам мутахассис ҳисобланади. Бундан ташқари, маълумотларга кўра, зарарланганига заррача гумон бўлганда ҳам, бутун бир туманлар ёпилиши ва узоқ вақтгача ҳеч ким уйидан чиқа олмаслиги мумкин эди.

Ўз навбатида, Шимолий Кореядан қочиб кетган невролог Чой Чон Хуннинг фикрича, у ерда коронавирус аниқ бор. Шунчаки, мамлакат соғлиқни сақлаш тизими шу даражада заифки, у ерда, ҳатто энг оддий касалликлардан ҳам одамлар ўлишмоқда ва режим халқаро майдонда ишончини йўқотмаслик мақсадида вирусга қарши кураша олмаслигини кўрсатишни истамаяпти.