Аҳоли бандлигини таъминлаш, тадбиркорлик ва ҳунармандчилик фаолиятини қўллаб-қувватлаш бўйича қўшимча чора-тадбирлар белгиланмоқда. Президентнинг бу борадаги тегишли қарори лойиҳаси муҳокамага эълон қилинди.

Ҳужжат лойиҳасига мувофиқ, тадбиркорлик фаолиятини бошлаётган ишсиз фуқароларга тадбиркорлик субъекти сифатида давлат рўйхатидан ўтгандан сўнг давтлабки уч ой мобайнида олинган бино ва иншоотнинг ижара тўлови ҳамда ҳунармандларнинг «Ҳунарманд» уюшмасига аъзолик бадали харажатларини қоплаш учун субсидия ажратиш бўйича янги механизмлар жорий этиш кўзда тутилган.

Шунингдек, Инқирозга қарши курашиш жамғармаси ҳисобидан Бандликка кўмаклашиш давлат жамғармасига қуйидаги мақсадларда маблағлар ажратилмоқда:

• Тадбиркорлик ва ҳунармандчиликни ривожлантириш, аҳолини томорқа ер участкалари самардорлигини ошириш ҳамда қишлоқ хўжалиги кооперативлари аъзолигига бадал тўлаш, тадбиркорлик ва ҳунармандчилик билан шуғулланувчи шахсларга бино ва иншоотлар ижараси ва аъзолик бадалларини тўлаш учун ишсиз, кам таъминланган ва камбағал оилаларга субсидиялар ажратишни молиялаштириш мақсадида қўшимча 80 миллиард сўм;
• Маҳалла гузарларида ташкил этиладиган касб-ҳунарга ўқитиш масканларини тикувчилик, ошпазлик, сартарошлик, электрик, сантехник йўналишлари бўйича ускуна ва жиҳозлар билан таъминлаш учун 50 миллиард сўм.

Қарор лойиҳаси муҳокамаси жорий ойнинг 23 санасига қадар очиқ.