Ҳукумат қарори билан Рустам Садуллаевич Искандаров «Ўздонмаҳсулот» акциядорлик компанияси бошқаруви раисининг молия, маркетинг ва инвестиция масалалари бўйича ўринбосари этиб тасдиқланди. Бу ҳақда Адли вазирлигининг «Ҳуқуқий ахборот» канали хабар берди.

Эслатиб ўтамиз, шу йилнинг июл ойида Фаррух Жаҳонгирович Пўлатов «Ўздонмаҳсулот» акциядорлик компанияси бошқарувининг раиси этиб тасдиқланганди.

Бунга қадар собиқ раис Сурат Ҳайдаров хизмат вазифаларини кўп марта суиистеъмол қилган ҳолда қариндош-уруғларини «Ўздонмаҳсулот» тизимидаги корхоналарга ишга жойлаштиргани, бунинг оқибатида пора олишнинг ўзига хос механизмини йўлга қўйгани, хусусан, жойлардаги дон маҳсулотлари корхоналари фаолиятида аниқланган камчиликларга кўз юмиш учун салмоқли пуллар пора сифатида олингани, бу жиноятларда унинг куёви Жамшид Шарипов унга фаол ёрдам бериб келгани маълум қилиниб, жиноий жавобгарликка тортилганди.

«Ўздонмаҳсулот» АКнинг асосий вазифаларига юқори сифатли ун навлари, ёрма, омихта ем, шунингдек нон-булка, макарон ва қандалотчилик маҳсулотлари ишлаб чиқаришни ҳамда иқтисодиёт тармоқлари ва республика аҳолисини улар билан таъминлаш киради.