Хабарлар тезкор Телеграм каналимизда Обуна бўлиш ×

Собиқ депутатнинг озод этилишига ойдинлик киритилди

Собиқ депутатнинг озод этилишига ойдинлик киритилди

Халқ депутатлари Наманган вилоят кенгашининг собиқ депутати Олимжон Тўхтаназаров озодликка чиққани ҳақида хабар берилганди.

Ушбу хабар тарқалганидан кўп ўтмай, Ўзбекистон Республикаси Олий суди унга изоҳ ўлароқ, ўз баёнотини тарқатди. Чунки, дастлабки хабарлар мазмуни жамоатчиликда гўёки собиқ депутат суддан оқланиб чиққанидай тасаввур пайдо қилиши эҳтимолини юзага келтирган эди.

Олий суднинг «Xabar.uz»га билдиришича, дастлабки терговда судланувчига нисбатан Жиноят кодексининг 168-моддаси 3-қисми «в» банди билан қўйилган айблов судда 25,168-моддаси 1-қисмига қайта малакаланган. Айбловдаги яна бир модда (ЖК 211-модда 1-қисми) тўғри квалификация қилинган, деб топилган. Натижада судланувчи ҳар икки модда билан айбдор деб топилиб, суд 3 йилу 1 ой озодликдан чеклаш жазоси тайинлаган. Бироқ бу ҳаммаси эмас. Тайинланган жазодан судланувчининг  ҳибсда ўтказган вақти чегириб ташланиб, 3 йил муддатга муайян ҳуқуқдан маҳрум қилган ҳолда 2 йил 8 ой 16 кун озодликни чеклаш жазоси қолдирилган.

Жазо тайинлашда ишнинг оғирлаштирувчи ва енгиллаштирувчи жиҳатларига алоҳида эътибор қаратилиб, судланувчининг оилавий шароити ва ягона боқувчилиги диққатдан соқит қилинмагани айтилмоқда.

Маълумки, «озодликдан чеклаш» янги жазо тури ҳисобланиб, у судланувчининг озодликдан батамом маҳрум этилганини билдирмайди. Шунга кўра, судланувчи О.Тўхтаназаровнинг эҳтиёт чораси бекор қилиниб, суд залидан очиққа чиқарилган.

Тайинланган жазо чоралари судланувчининг ҳукм устида тегишли тартибда шикоят қилиш ҳуқуқига дахл қилмайди.

 

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг