Интернет тармоғида Тошкентда номаълум шахслар эркакка қилич билан таҳдид қилиб, уни машинага мажбуран ўтқазиб номаълум тарафга олиб кетгани тасвирланган видео тарқалгани ҳақида хабар берган эдик.

Тошкент шаҳар ИИББнинг маълум қилишича, 11 август куни Тошкентнинг Учтепа туманида бир гуруҳ шахслар ВАЗ-2105 машинасида келиб, «Spark» ҳайдовчисини куч билан машинадан чиқариб, Сергели туманига олиб кетган ва калтаклашган. Ички ишлар бош бошқармаси текширув ўтказиб, Ўзбекистон Жиноят кодексининг 277-моддаси (безорилик) бўйича жиноий иш очди.

Воқеанинг тўлиқ тафсилотларини ўрганиш жараёнида барча далилий ашёлар тўпланиб, ушбу жиноий иш иштирокчиларининг кўрсатмалари олинди ва уларнинг ҳар бирига албатта тегишли баҳо берилади, дейилади ИИББ хабарида.

Ҳозирга қадар воқеанинг уч нафар жабрланувчиси ва яна уч нафар гумонланувчиси кўрсатма берган. Яна икки гумондор, жумладан ҳодиса ташкилотчиси деб айтилаётган 27 ёшли Ж.Шоҳрухни қўлга олиш ҳаракатлари олиб борилмоқда.

Аниқланишича, жабрланувчи — 23 ёшли А.Ботиржон таниши Шоҳрухдан пул қарз олиб, охирги 500 минг сўмни қайтаролмаган. Гумонланувчи Ж.Шоҳрух 24 ёшли Г.Зиёвуддин, 31 ёшли М.Музаффар, Н.Бекзод ва 33 ёшли И.Абдуғани билан «ВАЗ-2105» (Музаффар бошқарувида) ва Абдуғани бошқарган «Nexia 3» автомобилида «Ватан» кинотеатри ёнида «Spark» машинасини бошқариб кетаётган 34 ёшли М.Жасурнинг йўлини тўсиб, уни тўхтатишган.

Қўлга олинганларнинг кўрсатма беришича, Зиёвуддин «Spark» машинасининг шинасига зиён етказган, Музаффар эса ойнасини синдирган.

Шундан сўнг, ҳуқуқбузарлар жабрланувчиларни куч билан ўзларининг машиналарига ўтқизиб, Сергели туманига олиб кетишган ва ўша ерда уларга тан жароҳати етказишган. Жароҳат даражасига шифокорлар аниқлик киритишмоқда.

Шундан кейин Г.Зиёвуддин ва Н.Бекзод жабрланувчиларни шифохонага олиб бориб, ҳақиқатни айтиб қўймаслиги учун кузатиб туришган.

Қўрқув остида қолган жабрланувчилар шифокорларга бўлиб ўтган воқеа ҳақида айтишмаган ва ички ишларга ҳам хабар беришмаган. Лекин ҳолат тасвирланган видеолавҳа Интернет тармоғида тарқатилгандан сўнг, сир ошкор бўлган.

Тошкент шаҳар ИИББ мазкур тасвир асосида тезкор тергов ҳаракатларини олиб бориб, шу куни кечки пайт гумондорларнинг шахсига аниқлик киритилган ва қисқа фурсатда улардан 3 нафари қўлга олинган.

Алоҳида қайд этиб ўтиш керакки, ҳамшаҳарларимиз ён-атрофда бўлаётган воқеа-ҳодисаларга эътиборсиз бўлмай, «102»га хабар бераётгани ёки видео ва фотолавҳаларни юбораётгани катта ёрдам бўлмоқда. Орамизда ўзининг она шаҳри ва одамлар тақдирига бефарқ бўлмаган инсонлар кўплигидан хурсандмиз, дейилади хабарда.