«РИА Новости» тарқатган хабарларга кўра, Украинадаги ҳарбий ҳолат поёнига етди. Бу ҳақда мамлакат президенти Пётр Порошенко миллий хавфсизлик ва мудофаа кенгашининг кеча, 26 декабр куни ўтказилган йиғилишида расман баёнот берган: «Эълон қилинган ҳарбий ҳолат муддати бугун соат 14.00 да ниҳоясига етади ва у узайтирилмайди. Бу менинг қатъий қарорим!».

Мамлакатнинг ўнта ҳудудида ҳарбий ҳолат эълон қилиш тўғрисидаги қарор роппа-роса икки ой аввал — Украина ҳарбий-денгиз кемалари Керчь бўғозида Россия томонидан қўлган олинганидан сўнг қабул қилинган эди. Бунинг ортидан ундаги 24 нафар украиналик ҳарбий-денгизчи ҳибсга олинган, уларга «давлат чегарасини бузиш» айблови қўйилмоқда. Икки давлат ўртасидаги шундоғам таранг муносабатларни баттар кучайтирган ушбу ҳолатни Украина томони «халқаро-ҳуқуқий нормаларни қўпол равишда бузиш» демоқда, Россия эса «бу Киевнинг навбатдаги фитнаси», дея оёқ тираб турибди.

Берк кўчага кириб қолган муносабатларга ёруғ туйнук ҳозирча кўринмаяпти.