Андроид қурилмалар учун Xabar.uz мобил иловаси. Юклаб олиш ×
IOS qurilmalar uchun Xabar.uz mobil ilovasi. Юклаб олиш ×

Улар тўлаган жарима билан давлат бойиб кетмайди...

Улар тўлаган жарима билан давлат бойиб кетмайди...

Фото: Самарқанд вилояти ИИБ Ахборот хизмати

Айтишнинг ўзи оғир, ёзишни-ку айтманг: бир кунда (26 март) карантин қоидалари бузган ва жамоат жойларида ниқобсиз юрган 930 нафар шахс жавобгарликка тортилди. Улар тўлаган жарима билан давлат бойиб кетмайди, ҳуқуқбузарларга нисбатан қонуний чора кўрганлар рағбатларга кўмилмаслиги ҳам рост.

Бироқ гап бунда эмас ҳозир.

Гап ҳар бир ҳуқуқбузар нафақат ўзининг, ўзига қўшиб бошқалар – биринчи навбатда яқинларининг ҳам соғлигини хавф остига қўйиши эҳтимолини юзага келтираётганида!

Бугунги мураккаб ва оғир синовли давр мамлакат иқтисодига таъсир ўтказмай қолмайди, шунга қарамай, давлатимиз ўз фуқаролари саломатлиги муҳофазаси учун озмунча ишлар қилаётгани йўқ. Шифокорларни айтинг: улар ўз ҳаёти ва соғлигини гаровга қўшиб, пандемия билан мардона курашмаяптими?! Мана, кеча маълум қилинди: коронавирус инфекциясини юқтириб олган 65 нафар беморнинг 11 нафари шифокор экан! Сенинг саломатлигинг учун бошқалар молини эмас, жонини гаровга қўяётган экан, сен нега ўзингни ва яқинларингни асрамайсан, номард, деворгиларинг келади-да!

Бугундан Маъмурий жавобгарлик тўғрисидаги кодекснинг 54-моддаси («Эпидемияларга қарши кураш қоидаларини бузиш») ниқобсиз юрганлик учун жавобгарликни назарда тутувчи қисм билан тўлдирилди. Унда ниқобсиз юрганлик 1 млн. сўмдан ортиқ жаримага сабаб бўлиши белгиланди. Бундан ташқари санитарияга оид қонун ҳужжатларини ёки эпидемияга қарши кураш қоидаларини бузганлик учун жиноий жавобгарлик ҳам кучайтирилди.

Яъни, санитарияга оид қонун ҳужжатларини ёки эпидемияга қарши кураш қоидаларини бузиш одамларнинг оммавий касалланиши ёки заҳарланиши реал хавфини келтириб чиқарса ёхуд одамларнинг оммавий касалланишига ёки заҳарланишига олиб келса, бунинг учун 5 йилгача озодликдан маҳрум қилиш жазоси белгиланди (аввал ушбу муддат 3 йилгача эди). Агар ўша ҳаракатлар одамнинг ўлимига сабаб бўлса, озодликдан маҳрум қилиш жазоси муддати 5 йилдан 7 йилгача этиб, бир қанча одамларнинг ўлимига сабаб бўлса – 7 йилдан 10 йилгача этиб белгиланди (илгари ушбу муддатлар тегишлича 3 йилдан 5 йилгача ҳамда 5 йилдан 8 йилгача эди).

Нега бу борадаги қонун ҳужжатларида жавобгарлик кучайтирилмоқда? Коронавирусга қарши самарали вакцина ҳали кашф этилгани йўқ. Олимларнинг изланишлари кутилган натижа бериши учун вақт керак, албатта. Бироқ бало буни кутиб турмайди. Аксинча, вирус шиддат билан дунёга тарқалмоқда. Шундай экан, фақат мажбурий чоралар қўллаш билан вирусни жиловлаш мумкин ва буни Хитой давлати ўз тажрибасида исботлаб берди. Мажбурий чоралар қўллашдан бошқа самарали восита ҳозирча йўқ экан, уларни бузганлик учун жавобгарликни кучайтирилиши мутлақо табиий. Мақоламиз бошида келтирилган рақам, шунингдек, айрим юртдошларимизнинг карантиндан қочиш ҳолатлари юз берганини эслайлик.

Уқувсизлик, сабрсизлик ва ўзига қўшиб ўзгаларнинг тақдирига бефарқликнинг белгиси бўлган бундай ҳолатларга кескин чоралар кўриш билан чек қўшиш  вазият тақазосидир. Муҳтарам Прзидентимиз халққа қилган иккинчи мурожаатида бежиз куйиб-пишиб таъкид этмади: «Бир нарсани аниқ тушуниб олиш лозим. Бизда аниқланган касаллар сони кам-ку, 100 тага ҳам етмайди, хавотирга ўрин йўқ, деб хотиржам бўлиш хиёнат ҳисобланади». 

Ҳақ гап. Зеро, санитарияга оид қонун ҳужжатларини ёки эпидемияга қарши кураш қоидаларини бузилиши ортидан аввалдан башорат қилиб бўлмас муаммолар юзага келиши аниқ. Бу муаммолар инсон саломатлиги билан боғлиқ экан, бепарволик халққа хиёнат қилишдан бошқа нарса эмас. Хиёнаткор эса шунга яраша жазоланиши керак.  Зотан, Юртбошимиз ўринли қайд этганидек: «... Тиббиёт қанчалик ривожланган бўлмасин, давлат бунга қанча-қанча маблағ ажратмасин, одамларимиз шифокорлар тавсиясига амал қилмаса, тартиб-интизомли бўлиб, карантин қоидаларига риоя этмаса, барча кўрилаётган чораларимиз, пандемияга қарши курашиш учун сафарбар қилинган юз минглаб фидойи инсонларнинг меҳнати беҳуда кетиши мумкин»!

Коронавирус пандемияси бир халқ ёки маълум элат эмас, бутун инсоният учун Яратганнинг навбатдаги синовидир. Бундай синовни бирлашиб, бир муштга айланмасдан енгиш мумкин эмас. Муқаддас китобларимизда ҳам Яратганнинг синовига шукур ва сабр қилганларгина нажот топиши бежизга таъкид этилмаган. Аллома Абдулла Авлоний айтадики: «Сабр деб бошимизга келган бало ва қазоларга чидамли бўлмакка айтилур... Сабр – инсонлар учун буюк  фазилатдурки, жаноби ҳақ собирларни суяр!».

Азиз юртдошлар! Сабр-қаноатли бўлайлик, Сиз-у бизни касалликдан асраш учун тартиб жорий этилганлигини, эртанги кунимиз бугун қанчалик шу тартиб-интизомга риоя қилишимизга боғлиқ эканлигини унутмайлик!

Холмўмин Ёдгоров,
Олий суд раисининг ўринбосари

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг