Инсонда иммун тизими кучли бўлса касалликни тез енгиш мумкин ёки касаллик уни айланиб ўтади, хавф сезилмайди. Бунда овқатланиш рационига қатъий амал қилиш мақсадга мувофиқ. Ҳар қандай касалликка қарши вакцина олишнинг  ўзига хос тартиб қоидалари мавжуд. Яъни вакцина олиш учун ҳам иммун тизими мустаҳкам бўлиши лозим.

Бу ҳақда Россия овқатланиш ва биотехнология илмий-тадқиқот марказининг илмий директори, диетолог Виктор Тутелян оммавий ахборот воситаларига берган интервюсида ўз фикрлари билан ўртоқлашди: 

— Коронавирусга қарши эмлашдан олдин парҳез таркибига оқсилли маҳсулотлар киритилиши керак: гўшт, балиқ, тухум ва танадаги витаминлар даражасига, биринчи навбатда Д витаминига эътибор қаратиш лозим. Вакцина ўзига хос антителаларни ишлаб чиқаришни рағбатлантириш мақсадида қўлланилади, шундай экан, оқсилга эҳтиёж катта. Вакцина олгандан кейин ҳам ушбу парҳезга қатъий риоя қилиш лозим. Айнан коронавирус билан оғриган кўпчиликда Д витамини ва бошқа ёғда эрийдиган витаминлар етишмовчилиги аниқланган.