Россия Федерацияси президенти Владимир Путин АҚШ президенти Дональд Трампга шу йил 16 июль куни Ҳельсинки шаҳрида ўтказилган саммитда билдирган таклифлари секин-аста ошкор бўляпти, дея хабар беради «Hurriyet» нашри.

Путин ёпиқ эшиклар ортида Трампга ядровий қуроллар ишлаб чиқаришни чеклаш билан бирга яна бир нечта таклифларни билдирган. Бу ҳақда Американинг «Politico» газетаси маълум қилган. Нашрнинг ёзишича, Ҳельсинкидаги олий даражадаги учрашувда Путин Трампга 2010 йили иккала давлат ўртасида ядровий қуроллар ишлаб чиқаришни чеклаш бўйича имзоланган шартномани 5 йил муддатга узайтиришни таклиф қилган. Шу билан бирга, Россия етакчиси Ғарбий Европа давлатларида кузатилаётган бошбошдоқликларга эътибор қаратиб, расмий Вашингтон ва Москва бундай вазиятларнинг олдини олишга ҳар доим шай туришини таклиф қилган.

Путин, шунингдек, минтақада хавфсизликни ошириш ва ҳарбий соҳада шаффофликни таъминлаш тарафдори эканини айтган.

Путиннинг яна бир таклифи сифатида иккала давлат бош штаблари бошлиқлари билан бирга Ташқи ишлар ва Мудофаа вазирларининг учрашувини 2+2 форматда ташкил қилиш билдирилди.