Андроид қурилмалар учун Xabar.uz мобил иловаси. Юклаб олиш ×
IOS qurilmalar uchun Xabar.uz mobil ilovasi. Юклаб олиш ×

Ўзбекистон Мудофаа вазири АҚШ Қуролли Кучлари қўмондони билан учрашди

Ўзбекистон Мудофаа вазири АҚШ Қуролли Кучлари қўмондони билан учрашди

Фото: Мудофаа вазирлиги матбуот хизмати

Бугун, 20 февраль куни Ўзбекистон Мудофаа вазири генерал-майор Баходир Курбанов Америка Қўшма Штатлари Қуролли Кучлари Марказий қўмондонлик қўмондони генерал Жозеф Вотел билан музокаралар ўтказди. Бу ҳақда Мудофаа вазирлиги матбуот хизмати хабар бермоқда.

Учрашувда мудофаа соҳасидаги икки томонлама ҳамкорликнинг бугунги ҳолати муҳокама қилиниб, ҳарбий таълим ва мудофаа соҳаларида истиқболдаги режалар белгилаб олинди. Ўзаро манфаатли ҳамкорликларни кучайтириш борасида фикрлар алмашилди. Суҳбатда мамлакатларимиз ўртасида ҳарбий соҳада ҳамкорлик йўналишларида ўсиш суръатлари ортиб бораётгани алоҳида таъкидланди.

АҚШ томони ҳарбий ва ҳарбий-техника соҳасида, шунингдек, минтақада хавфсизликни таъминлаш борасидаги долзарб масалаларига ва Ўзбекистон—Америка мудофаа идоралари ўртасидаги келишувларга Ўзбекистон алоҳида эътибор қаратаётганини эътироф этди.

Генерал Жозеф Вотел генерал-майор Баходир Курбановни мудофаа вазири лавозимига тайинлангани билан чин юракдан табриклади. Шунингдек, генерал Вотел ўтган ташрифидан қолган таассуротларидан энг ёрқини – Самарқанд шаҳрига саёҳати ва тарихий обидалар билан танишуви эканини билдирди.

Фото: Мудофаа вазирлиги матбуот хизмати

Учрашув давомида Афғонистондаги вазиятни ўнглаш, халқаро терроризмга барҳам бериш ҳамда минтақада тинчликни барқарор ушлаб туриш бўйича фикрлар алмашилди.

«Таъкидлаш керакки, Ўзбекистон минтақанинг барқарорлиги ва ривожланишига сезиларли даражада таъсир кўрсатадиган қўшни Афғонистон давлатида тинчлик ва хавфсизлик йўлидаги барча ҳаракатларни қўллаб-қувватлайди. 2018 йилнинг март ойида Тошкент шаҳрида Афғонистон масалалари бўйича «Тинчлик жараёни, хавфсизлик соҳасида ҳамкорлик ва минтақавий шериклик» халқаро анжуманининг ўтказилгани, шунингдек, унинг якунида «Тошкент декларацияси» қабул қилинганининг ўзи Ўзбекистон терроризмнинг бошқа мамлакатларда тарқалмаслиги тарафдори эканлигини кўрсатади»,-дейилади хабарда.

Эслатиб ўтамиз, ўтган йилнинг май ойида Ўзбекистон мудофаа вазири Жозеф Вотел бошчилигидаги делегацияни кутиб олган эди. Шу йилнинг январь ойида эса Ўзбекистон Мудофаа вазирлиги делегацияси АҚШда бўлиб, мамлакатимиз махсус бўлинма ҳарбий хизматчилари иштирокида Кемп-Шелби ҳарбий базасида ўтказилган «Жанубий зарба» ҳамкорликдаги машғулотларни кузатди ҳамда CENTCOM қўмондонлиги билан икки томонлама ҳарбий ҳамкорлик масалаларини муҳокама қилган эди. 

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг