2020-2021 йил Испания Ла Лигаси ва Европа чемпионлар лигасидаги муваффақиятсизликдан сўнг Мадриднинг «Реал» клубида бир қанча ўзгаришлар бўлди.

Жамоани номдор бош мураббийи Зинедин Зидан ва узоқ йиллик сардори Серхио Рамос тарк этишди.

Флорентино Перес клубга бегона бўлмаган тажрибали мураббий – Карло Анчелоттини олиб келди. «Бланкос» билан ўз вақтида муваффақиятлар қайд этган жисмоний тайёргарлик бўйича мураббий Антонио Пинтус лавозимига қайтарилди. Энди улар инқилобий ўзгаришларни бошлаши керак.

Ўтган мавсумда кадрлар танқислиги «Реал»нинг муваффақиятсизликларига сабаб бўлди, дейишимиз мумкин. Шундай вазиятда жамоанинг бир қанча нуқталарини янгилаш лозимлиги ҳам ойдинлашиб қолган. Сўнгги 2 трансфер бозорида «мум тишлаган» қироллик клуби бу мавсумда қайси трансферларга қўл уради? Умуман олганда, «Реал Мадрид»га қайси футболчилар кутилганидан кўпроқ ёрдам бериши мумкин? Қуйида жамоага ёрдам бера оладиган беш нафар футболчи билан танишамиз.

5. Жюль Оливье Кунде

22 ёшли француз «Севилья»да ажойиб ўйинлар кўрсатди. Кунде ҳар бир тўпга курашувчан, тезкор, жисмонан етук ва энг муҳими рақиб ҳужумларини бузувчи футболчи. Асосий ўйин позицияларининг марказ ва ўнг қанот ҳимояси бўлганлиги ҳам «Реал» учун айни муддао. Ўнг қанот ҳимоясида ўйнайдиган Карвахалнинг бутун бир мавсумни ўтказиб юборгани ва Васкеснинг унинг позициясига ўтказилиши Кунде каби майдоннинг кенг қисмини назорат қила оладиган футболчига эҳтиёжни оширади.

Ҳозирда «Севилья» аъзосининг трансфер нархи 60 млн еврони ташкил қилмоқда. Айнан ушбу сумманинг баландлиги трансфер амалга ошишига тўсқинлик қилиши мумкин.

4. Йозуа Киммих

«Бавария» сотиш ниятида бўлмаган, аммо «Реал Мадрид» учун энг муҳим футболчилардан бирига айланиши мумкин бўлган футболчи — Йозуа Киммихдир. Ташқи кўриниши ҳам, ўйин услуби ҳам Тони Кроосни эслатадиган бу футболчида майдонни кўра олиш қобилияти жуда яхши ривожланган. «Реал»нинг асосий қуроли ҳисобланган Кроос ва Модрич каби футболчилар кексаяётган бир даврда 26 ёшли Йозуа учун «Реал» мукаммал ечим бўлиши мумкин. Киммих 2014 йилда «Бавария»дан Мадридга ўтиб, жамоанинг моторларидан бирига айланган Тонидан ўрнак олса, ажабмас.

3. Николо Барелла

Яна бир «Реал» аъзосини эслатувчи Николо яқин келажакда италиан футболининг Модричига айланиши кутилмоқда. Барелла жисмоний жиҳатдан жуда кучли бўлмаса-да, майдондаги кузатувчанлиги, шерикларини яхши тушуна олиши билан «Интер»да яхши муваффақиятларга эришди.

Феде Вальверде дастлаб Модричга ўринбосар сифатида кўрилган бўлса ҳам, уругвайлик кўпроқ Казимеронинг ўйинини эслатиши Барелланинг фойдасига хизмат қилиши мумкин. Шунингдек, агар Йозуа Киммих ҳам «Реал Мадрид» трансферига айланса, «янги Модрич-Кроос» тандемидаги ўйинларни томоша қилармиз.

2. Килиан Мбаппе

Дунёнинг энг қиммат футболчиси «Килиан Мбаппе ва Мадрид» эртаги Роналду клубни тарк этганидан бери давом этади.

Қироллик клуби мухлислари ҳам узоқ вақтдан бери айнан французнинг трансферини талаб қилишмоқда. Ҳужумнинг исталган позициясида ўйнай оладиган, тезкор ва техникали футболчининг ўзи ҳам «бланкос» либосини кийишга қарши эмас.

Парижнинг «ПСЖ» клуби гарчи футболчини жамоада асраб қолишга уринган бўлса-да, бефойда бўлмоқда. 160 млн еврога баҳоланган футболчининг амалдаги шартномаси 2022 йилгача мўлжалланган. Ўз навбатида, Мбаппе шартномани узайтириш таклифларини рад этмоқда. Агар «ПСЖ» шу трансфер мавсумида футболчини сотмаса, кейинг йил эркин агент сифатида текинга Мадридга ўтиб кетиши мумкин.

1. Ҳоланд

Эрлинг Ҳоланд — фавқулодда истеъдод соҳиби. Боруссия шаҳридаги қойилмақом ўйинлари унинг трансфер нархини 130 млн еврогача кўтарди. Классик марказий ҳужумчи сифатида у «Реал»даги кўплаб муаммоларга ечим бўлиши мумкин.

Тўп билан муомалада совуққон ва мадридча ҳиссиётларни намойиш этадиган футболчига харидорлар кўп.

«Реал»нинг асосий рақиби бўлган «Барселона», ҳужумчиларга пул сарфлашдан чарчамайдиган «Челси», Серхио Агуэрони йўқотган «Манчестер Сити» каби жамоалар Ҳоландни трансфер қилмоқчи. Кўплаб футбол мутахассислари айнан Ҳоланд Мадриддаги анча йилдан бери давом этаётган классик ҳужумчи танқислигига барҳам бериши мумкин ва у Килиандан кўра афзалроқ дейишмоқда. Яқин келажакда қироллик клуби янги даврни бошлаши кутилмоқда.

Санжар Машриқий тайёрлади.