Европа футбол ассоциациялари иттифоқи (УЕФА) йилнинг энг яхши ўйинчиси бўлишга номзодлар рўйхатини эълон қилди. Бу ҳақда «Life» хабар берди. Якуний учликка «Реал» яримҳимоячиси Лука Модрич, «Ливерпуль» вингери Муҳаммад Салоҳ, «Ювентус» форварди Криштиану Роналду киритилди.

Модрич ва Роналду ўтган мавсумда Чемпионлар лигасини ютишди, бу Роналду учун бешинчи ғалаба, қолаверса, у олтинчи маротаба энг яхши тўпурур бўлди. Модрич 2018 йилги Жаҳон чемпионати кумуш медалини қўлга киритишдан ташқари, мундиалнинг энг яхши ўйинчиси деб эътироф этилди. Салоҳ Чемпионлар лигасининг иккинчи тўпурарига айланиб, «Ливерпул»даги кўплаб рекордларни янгилади.

Учликка кира олмаган футболчилар:

Антуан Гризманн («Атлетико»), Лионель Месси («Барселона»), Килиан Мбаппе («ПСЖ»), Кевин де Брёйне («Манчестер Сити»), Рафаэль Варан («Реал»), Эден Азар («Челси») ва Серхио Рамос («Реал»).

Бошқа мукофотларга номзодлар:

Энг яхши дарвозабон: Алиссон Беккер, Жанлуиджи Буффон, Кейлор Навас

Энг яхши ҳимоячи: Марсело, Серхио Рамос, Рафаэль Варан

Энг яхши яримҳимоячи: Кевин Де Брёйне, Тони Кроос, Лука Модрич

Энг яхши ҳужумчи: Лионель Месси, Криштиану Роналду, Муҳаммад Салоҳ

Энг яхши футболчи (аёллар ўртасида): Пернилле Хардер, Ада Хегерберг, Амандин Анри

Европа лигасининг энг яхши ўйинчиси: Диего Годин, Антуан Гризманн, Димитри Пайет.

Мукофотлар 30 август куни тантанали равишда топширилади. Ўша куни жорий мавсум Чемпионлар лигасига қуръа ҳам ташланади.