...13 ёшли Лионел Месси Аргентинанинг Росарио шаҳри юлдузи эди. Газеталар у ҳақда ёзишарди, жамоатчилик янги истеъдодни муҳокама қиларди. Унинг донғи пойтахт Буэнос-Айресгача етиб борди. «Ривер Плейт» клуби вакиллари ёш футболчини ўргана бошлашди.

2000 йили Мессилар хонадонига Росариода фаолият юритувчи «Марка» футбол агентлиги вакиллари — Мартин Монтеро ва Фабиан Солдинилар келиб, болакайни Европанинг гранд клубларига тавсия қилиш лозимлигини айтишади. Шу йилнинг август ойида улар «Марка»нинг Европадаги ҳамкорларидан бири Орасио Гаджоли билан янги истеъдод ҳақида гаплашишди. Гаджоли ҳам асли росариолик бўлиб, 70-йилларда Барселонада кўчмас мулкка инвестиция киритган ва Каталония суперклуби акциядорларидан бири, ўша пайтдаги клуб президенти Жоан Гаспарнинг маслаҳатчиси Хосеп Мария Мингеля билан танишлиги бор эди. Агентлар Гаджолига Леонинг ўйинлари ёзилган кассетани юборгач, «Барселона» кўригига таклиф  олдилар.

2017 йилнинг ёзида Орасио Гаджоли «Globoesporte»га берган интервюсида қизиқ маълумотни айтиб ўтди: «Баъзи сабабларга кўра мен ўша пайтда Испания пойтахтига эмас, Барселонага кўчиб ўтдим. Агар Мадридга кўчганимда, Месси «Реал»да бўлиши ҳам мумкин эди».

2000 йилнинг 17 сентябрида Лео ва Хорхе Мессилар агент Фабиано Солдини билан биргаликда Барселонага учишди. Аэропортда уларни Орасио Гаджоли кутиб турарди. Кейинги кун Лео майдонга тушди ва рақиб дарвозасига 6 та тўп киритди. Мураббийлар йигитчага қойил қолишди. Лекин улар «Барса»нинг спорт директори Карлес Решаксиз қарор қабул қилишолмасди. У эса Австралияда бўлиб ўтаётган Олимпия ўйинларига кетганди. Решакнинг келишига Леони жиддий синов кутарди. У ўн беш яшар болалар билан бирга майдонга тушиши зарур эди. Аммо Лео ўзидан катталар билан ҳам шунчалик зўр ўйнадики, кичик ёшдагилар мураббийлари «биз уни зудлик билан олишимиз керак!», деб бақириб юборишди.

Икки кундан сўнг Лео ва Хорхе Аргентинага яхши кайфиятда қайтишди. Решак уларни яқин вақт ичида Барселонага чақиришини ва шартнома имзоланишини айтиб, ишонтирди.

Аммо, бир неча ҳафта ўтса ҳамки, чақирувдан дарак йўқ эди. Хорхе ҳам, Солдини ҳам анча асабийлашди. «Барселона» келишувни пайсалга сола бошлади. Чунки ёш йигит билан тузилажак шартнома мунозарали, лойиҳа ўзини оқламаслиги ҳам мумкин эди. Биринчидан, Леонинг бўйини ўстириш учун нархи қиммат бўлган махсус инекция қилиниши лозим эди. Бу эса Ла Масия ғазнасига путур етказарди. Иккинчидан, Лео ётоқхонада яшашни хоҳламади. Месси оиласи билан кўчиб келишни хоҳлаётганлиги учун, алоҳида уй ижарага олиниши лозим эди. Бутун оила учун яшаш жойи, кўчиб келиш ва даволаниш харажатлари — гарчи у ўта истеъдодли футболчи бўлса ҳам, клуб учун ортиқчалик қилар эди.

2000 йилнинг 14 декабрида «Помпей» теннис клубининг ресторанида Решак, «Барса»нинг директорларидан бири, бир пайтлар клубга Диего Марадонани олиб келган Мингеля ва Леонинг вакили Орасио Гаджолилар учрашишди. «Карлес, жуда чўзилиб кетди. Лео ё «Барселона»да ўйнайди ё бошқа клуб топаман. Қўрқитмоқчи эмасман, биз «Реал» билан жиддий музокара олиб бордик», — деди Гаджоли...

«Мен бу болакайни қўйиб юборишни истамадим ва қоғоз сочиқни олиб: «Клуб Лео Месси билан келишилган шартлар бўйича шартнома тузишини ваъда беради» деб ёздим, имзо чекиб, уни Орасиога бердим. Гаджоли ва Мингеля ҳам сочиққа қўл қўйишди», — деб эслайди Решак кейинчалик.

Қоғоз сочиқдаги жентелменлик келишувига «Барса» бир неча кафолат хатларини ҳам қўшиб қўйди. Уларда оила учун ижарага олинадиган уй, ўқиш учун мактаб, ҳатто отасининг янги ишидаги маошигача кўрсатилган эди. Мессилар оиласи 2001 йил 15 февралда «бутун таркиби» билан кўчиб келди...

2001 йилнинг ёзида «Барселона»га янги бош директор Хавер Перес Фаргуелл келди. У Лео билан тузилган илк шартномани кўриб, 100 миллион песеталик (600 минг евро) маошдан ҳайратланди ва ёш бола учун бу жуда катта сумма эканлигини айтди. Шартнома қайта кўриб чиқилди ва клуб Месси учун 20 миллион песета (120 минг евро) тўлашни бўйнига олди.

Шундан сўнг, томонлар бир неча бор келишишга ҳаракат қилишди. Аммо музокара боши берк кўчага кириб қолган эди. Директорлардан бири ўшанда: «У ўзини Марадонаман деб ўйлаяптими? Шартномани бекор қилиб, болани Аргентинга жўнатиб юбориш керак!», — деган фикрни билдирган эди.

Хорхе Месси ҳам «Барса» билан музокарадан умидини узган вақтда «Реал» спорт директори Хорхе Валдано қўнғироқ қилади. У Мадрид клуби Лео учун мавсумга 20 миллион песетa ёки ундан ҳам кўпроқ бериши мумкинлигини айтади. Табиийки, Валдано «Барселона» билан уруш қилиш ниятида эмас эди. Шунинг учун ҳам бу таклифни ошкор қилмасликни сўрайди. Қарор қабул қилиш Мессилар оиласида қолган эди.

Бу пайтда «Барса» раҳбарияти ҳам анча ўзгариб, кейинги музокараларда Мессига ён босади. Янги шартномада 100 миллион песеталик маош, уй ижараси ва бир қатор бошқа тўловлар ҳам кўрсатилган эди.

Агар Решак ўша қоғоз сочиққа имзо қўймаганда, Лео Месси бугун «Реал»да ўйнаши ҳам, футбол тарихи ҳам умуман бошқача тус олиши мумкин эди...