Андроид қурилмалар учун Xabar.uz мобил иловаси. Юклаб олиш ×

ОФКнинг ўзбекистонлик мутахассиси: «Ўзбекистон терма жамоасидан яхши натижа кутяпман»

ОФКнинг ўзбекистонлик мутахассиси: «Ўзбекистон терма жамоасидан яхши натижа кутяпман»

Фото: www.the-uff.com

Осиё футбол конфедерациясида фаолият юритаётган ўзбекистонлик мутахассис Аваз Бердиқулов Ўзбекистон Олимпия терма жамоасининг айни пайтда Хитойда давом этаётган Осиё чемпионатидаги иштироки ҳақида ўз фикрларини билдирди.

«Терма жамоамиз кучли, Қатар билан ўйинда ҳам вакилларимиз тўла устунликка эга бўлишганди. Шунинг учун бу терма жамоа аъзоларидан яхши натижа кутяпман.

Терма жамоамиз таркибида бир қатор тажрибали футболчилар, жумладан, Осиё чемпионлари бор. Таркибдаги аксарият футболчилар учун бу биринчи халқаро мусобақа эмас.

Айни пайтда Олимпия терма жамоамизни бошқараётган мураббийимиз Равшан Ҳайдаров ҳам катта мусобақаларда ишлаган, Осиё чемпионати иштирок этиш тажрибаси бор.

Бу футбол, охирги ўйинда ҳар қанақа натижа рўй бериши мумкин, шунинг учун ҳозир тахмин қилиш бефойда.

Умид қиламизки, шу таркиб 2020 йил Токида бўлиб ўтадиган Олимпиадага ҳамда 2022 йил Қатарда бўладиган Жаҳон чемпионатига йўлланмани қўлга киритади», - дейди Аваз Бердиқулов.

Аваз Бердиқуловни кўпчилик футбол мухлислари яхши билишади. Ўз вақтида у «Чемпион» газетаси ва «ФИФА» журналидаги ўткир мақолалари билан кўпчиликнинг эътирофига сазовор бўлган. У 1999 йил Англиянинг Борнмут шаҳри Университетида Журналистика бўйича магистратурани тамомлаган. Ўқишни тамомлаганидан сўнг Ўзбекистон Республикаси Ташқи ишлар вазирлиги қошидаги Жаҳон ахборот агентлигида фаолият юритган.

2004-2008 йиллар оралиғида Хитойнинг Пекин шаҳрида Шанхай ҳамкорлик ташкилотида Ўзбекистоннинг вакили сифатида ишлаган. 2008 йил Хитойдаги шартномаси якунига етганидан сўнг ёзда Осиё футбол конфедерациясига ишга таклиф қилишган. Аваз Бердиқулов шу йили ОФКнинг Мусобақаларни ташкил қилиш ва ўтказиш Департаментида иш бошлган.

Ўтган 9 йилдан ошиқроқ вақт давомида у ОФКнинг Мусобақалар ташкил қилиш ва ўтказиш Департаменти Терма жамоалар бошқармаси бошлиғи лавозимигача кўтарилди. Айни пайтда ана шу лавозимда фаолият юритмоқда.

Изоҳлар 0

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг