«Championat.com» қишда кутилаётган трансфер миш-мишларини эълон қилди. Уларнинг баъзилари ҳақиқатга яқин, баъзилари навбатдаги пиарга ўхшайди...

 Неймар («ПСЖ» → «Реал»)

Баъзида Неймарнинг ўзидан кўра, унинг отаси футболчи ҳақидаги миш-мишларнинг келиб чиқишига сабабчи бўлиб қолмоқда. Ўтган ҳафтада унинг Испанияга бориб, «Реал» раҳбарияти билан учрашгани ҳақидаги хабарлар чиқди. Афтидан, бразилиялик ҳужумчи Парижда ўзини унчалик яхши ҳис қилмаяпти. Қизиғи, Чемпионлар лигасининг нимчорак финалида «ПСЖ» айнан «Реал»га қарши ўйнайди.

Муҳаммад Салоҳ («Ливерпул» → «Реал»)

«Реал»нинг яна бир янги ўйинчиси «Ливерпул»нинг мисрлик ҳужумчиси Муҳаммад Салоҳ бўлиши мумкин. Агар келишув амалга ошгудек бўлса, Салоҳ «Ливерпул» менежментининг «Луис Суарес иши»дан кейинги навбатдаги ютуғи бўлади.

Эмре Жан («Ливерпул» → «Ювентус»)

Салоҳ Ливерпулда экан, Эмре Жан ўз ҳолатидан рози бўлмайди. Германиялик ярим ҳимоячи унга «Ювентус»дек жамоанинг қизиқаётганини билгач, мерсисайдликлар билан янги шартнома имзолашга шошилмаяпти. Ярим йилдан кейин у эркин агент мақомини олади ва баъзи миш-мишларга қараганда аллақачон туринликлар билан беш йиллик шартнома имзолаб бўлган.

Виржил ван Дейк («Саутгемптон» → «Манчестер Сити»)

Пеп Гвардиолага рекордлар камлик қиляпти чоғи. У жамоасини қишда янада кучайтириш мақсадида. Каталониялик мураббий «Манчестер Сити»га камида яна битта марказий ҳимоячи керак деган фикрда. Номзодлар иккита – «Реал Соседад» ҳимоячиси Иниго Мартинес  ва «Саутгемптон»дан Виржил ван Дейк. Биринчиси арзонроқ бўлса-да, Англияга мослашиш билан боғлиқ муаммоси бор. Иккинчиси учун эса шайхлар «Ливерпул» билан рақобатга киришишлари лозим.

Генрих Мхитарян («Манчестер Юнайтед» → «Интер»)

Жозе Моурино ўзига ёқмай қолган футболчини исталган вақтда жамоасидан ҳайдаши мумкин.  Масалан, «Челси»да Хуан Мата билан шундай ҳолат юз берган бўлса, «МЮ»да бу ҳолат арманистонлик футболчининг чекига тушди. Матбуот анжуманлардан бирида португалиялик мураббий Мхитарянни яхшигина маблағ эвазига сотиб юбориши мумкинлигини яшириб ўтирмади. Омавий ахборот воситаларида футболчи учун энг яхши вариант – Спаллеттининг «Интер»и ёки ўзи учун бегона бўлмаган «Боруссия» эканлиги айтилмоқда.

Алекс Сандро («Ювентус» → «Манчестер Юнайтед»)

«МЮ»дан кетадиганлар рўйхатининг 2-поғонасида анчадан  буён жароҳатидан қутула олмаётган Люк Шоудир. Унинг ўрнига Моурино «Ювентус»дан Алекс Сандрони сотиб олиш ниятида. Бразилиялик Турин клуби билан шартномани узайтиришдан бош тортди. Эҳтимол у Италияни чемпион сифатида тарк этишни хоҳлаётгандир. «Манчестер Юнайтед» ҳимоячи учун 60 миллион фунт тўлашга тайёр.

Антуан Гризман («Атлетико» → «Барселона»)

Охирги ҳафтада Испанияда яна «Атлетико» етакчисининг «Барса»га ўтиши ҳақидаги хабарлар урчиди. Гап шундаки, яқинда каталонияликлар президенти Хосеп Бартомеу Гризманнинг оиласи билан учрашган. Дарвоқе, футболчининг иши билан унинг синглиси шуғулланмоқда. Бунга жавобан, «Атлетико» менежерлари шикоят қилишга ҳам улгуришди. «Барса» ҳам барчасини инкор этиб келмоқда.

Хавер Маскерано («Барселона» → «Хэбей Чайна Форчун»)

Аргентинлик ҳимоячи «Барселона»дек жамоада қолгиси келмаяпти. Маскерано каталонияликларнинг барча таклифларини рад этиб, ҳаётида жиддий ўзгариш қилиш ниятида. Яхшиямки, унинг бахтига Хитой чемпионати бор. Осиёликлар ҳимоячига ҳозиргисидан уч баравар кўпроқ маош таклиф қилишмоқда. «Хэбей Чайна Форчун» клуби билан яқин орада тузилажак шартнома орқали каталонияликлар 6 дан 10 миллион еврогача маблағга эга бўлишлари мумкин.

Аҳмад Мусо («Лестер» → «Сток Сити»)

«Лестер»нинг захира футболчилари орасида ўтиравериш нигериялик футболчининг жонига тегди. Шунинг учун ҳам трансфер мана шу қишнинг ўзидаёқ амалга ошиши мумкин. Мусо ўзининг собиқ жамоаси ЦСКАга келиши даргумон, аммо АПЛда жон сақлашга уринаётган «Сток Сити»га ижара асосида ўтишига ишонса бўлади.

Александр Зинченко («Манчестер Сити» → «Наполи»)

Россия Премер-лигасининг яна бир собиқ футболчиси бошқа бир Англия клуби захира ўриндиғида умрини ўтказмоқда. Бироқ Зинченконинг «Манчестер Сити»даги шериклари Мусонинг «Лестер»даги рақобатчиларидан анча жиддийроқ. Италияда украиналик ярим ҳимоячи билан «Наполи» қизиқаётгани гапирилмоқда. Бўлажак трансферга биргина Гвардиола қаршилик қилиши мумкин.