Ҳабиб Нурмагомедов яна икки-учта жанг ўтказгач, карьерасини тугатади. Бу ҳақда унинг отаси Абдулманноп «Fight Nights Global TV»нинг Youtube-каналида маълум қилди, деб ёзади «Рамблер».

Абдулманноп Нурмагомедов UFC доирасида ўғлининг Конор Макгрегор билан яна бир жанг ўтказиш эҳтимоли жуда камлигини, лекин назарий жиҳатдан бўлиши мумкинлигини тан олди — бунинг учун Ҳабиб билан жанг қилиш ҳуқуқига эга икки жангчи ўз ҳуқуқларини рад этиши керак.

Катта Нурмагомедов ирландиялик учун бошқа бир россиялик — Ислом Махачев билан олишуви катта жанг бўлиши мумкинлигини айтди.

— Ислом ўзининг чемпионлик мақсадига эришиш учун йўлида дуч келган ҳамма нарсани яксон қилади, — дейди у.

Абдулманноп Нурмагомедовнинг фикрича, Махачев бир-иккита жангдан сўнг чемпионлик унвони учун жанг қилиши мумкин. Ҳабиб эса икки-учта жангдан кейин «кетиши керак».

Июль ойида катта Нурмагомедов ўғлининг спорт карьерасини тугатиш вақти яқинлашаётганидан хавотирланмаётганини, чунки унга ўринбосар тайёрлаб қўйганини эълон қилганди. Унинг сўзларига кўра, ўринбосар Ҳабибдан қолишмайди.