«CCS Insight» компанияси мутахассислари 2018 йил куз фаслида сотувга чиқадиган «iPhone X Plus», агарда қўлма-қўл бўлиб кетса, дунё смартфонлар бозоридаги нарх-навога салбий таъсир кўрсатади деб ҳисоблашмоқда.

«iPhone X» тажрибасидан кўриб турибмизки, харидорлар энг нуфузли ва техник мукаммал смартфонни қўлга киритиб ўз мавқеини «мустаҳкамлаш» учун 1000 доллардан воз кечишга шай.

— Компания «iPhone X» учун 1000 доллар нарх қўйиб бутун соҳага «ҳиммат» кўрсатди. Янги нархнинг шакллантирилиши бошқа ишлаб чиқарувчиларнинг қўлини боғлаб қўйгани учун улар ҳам ўз қурилмалари нархини сунъий равишда оширишни бошлашди, — дейди «CCS Insight» таҳлилчиси Бен Вуд.

«Apple» компанияси смартфоннинг қимматлашувига харажатлар ошгани, хусусан, қурилманинг сифати яхшилангани, қиммат бутловчи қисмлар ўрнатилганини важ қиляпти. Бироқ экспертларнинг фикрича, бу шунчаки чўпчак, агар қурилма нархи бутловчи қисмлар таннархига мос равишда ўсганида бунчалик катта сакраш бўлмасди.